Artea eta sorkuntza, Legaleon T eskolaren udararako proposamena
Udaleku irekiak antolatu dituzte uztailerako. 7-14 urte bitarteko haurrek arte espresio ezberdinak landuko dituzte, tartean antzerkia, plastika edo musika.
Maider Galarza eta Idoia Hernandez. Irungo Legaleon T antzerki eskolak udaleku irekiak antolatu ditu datorren uztailerako. 7-14 urte bitarteko haur eta nerabeei zuzendutako arte eta sorkuntza udalekuak izango direla diote antolatzaileek, jokoa eta esperimentazioa oinarri direlarik. Arte diziplina ugari landuko dituzte, hala nola, antzerkia, plastika, musika eta bideogintza.
Uztailaren 1ean ekingo diete udalekuei, eta 26ra bitarte luzatuko dituzte. Lan egunetan izango dira udalekuak, egunero, 09:30tatik 13:30tara. Matrikulatzeko interesdunek 80 euro ordaindu beharko dituzte aste baterako; bi asteko matrikula 120 eurokoa da. Izena emateko, 619 56 41 25 edo 658 74 36 01 telefono zenbakietara deitu beharko da, ekainaren 7ra bitarte (barne).
Maider Galarza eta Idoia Hernandez izango dira udalekuen begiraleak. Galarzak Nafarroako Antzerki Eskolan eta Estudis de Teatre Berty Tobias eskoletan egin zituen ikasketak. Ondoren, Oihulari Klown edo En la Lona bezalako antzerki konpainietan aritu da. Hernandezek berriz, Oiartzungo Ibargain Musika Eskolan ikasi zuen. Egun, konposizio ikasketekin jarraitzen du; 2Bat musika eta poesia talde sortzaileetako bat izan da. Informazio gehiago, esteka honetan.
