"Benetako garapen agentzia izan dadin", Bidasoa Bizirik goitik behera birmoldatzea proposatu du EH Bilduk
EH Bildu taldea hiriko egoera ekonomikoaz aritu da gaurko agerraldian. Urte luzez programa ekonomiko batean lanean ibili direla diote, eta datorren asteazkenean aurkeztuko dutela.
Silvestre Balerdi eta Jokin Melida, gaurko agerraldian. Irungo EH Bilduk agerraldia egin du gaur Bilgunean. Bertan, hiriko egoera ekonomiko “gordinaz” aritu dira Jokin Melida alkategaia eta Silvestre Balerdi zerrendako kidea (10. postuan doa). Azken zazpi urteetan eredu batean lanean gogor ibili direla nabarmendu dute, eta datorren asteazkenean gizarteratuko dutela. Palmera Montero Gunean bilduko dira herritarrekin, programa ekonomikoa osorik aurkezteko.
Hiriko egoera ekonomikoa kaskarra dela nabarmendu du bikoteak, EUSTATen azken datuei erreferentzia eginez. Egun, hiriko langabezi tasa %10,94ekoa dela nabarmendu dute, Gipuzkoa mailakoa %8koa den bitartean. Gainera, hiriko datuak lurraldekoekin alderatuta, industria sektorean esaterako alde nabarmena dagoela nabarmendu nahi izan dute (ia %8 gutxiago Irunen).
Neurri “handi eta zehatzak” hartzeko garaia iritsi dela diote koaliziotik. “Gure iritziz, Bidasoa Bizirik izan behar du hazkunde ekonomikoaren bultzatzailea. Egun ez du behar bezala funtzionatzen, horretarako proposatzen dugu erabat birmoldatzea, goitik behera, benetako garapen agentzia izan dadin”, adierazi du Balerdik.
Era beran, maiatzeko 26ko hauteskundeetarako programan lau ildo nagusi jorratuko dituztela jakinarazi dute: industria, energia, merkataritza (ostalaritza eta turismoa barne) eta lehen sektorea. Horietan guztietan proposamen orokor eta zehatzak dituztela diote. Guztien berri izateko, datorren asteazkeneko (hilak 8) ekitaldira bertaratzeko gonbita luzatu dute. Bertan, programa ekonomiko guztia gertutik ezagutzeko aukera izango da, koalizioak hirirako duen “plan ekonomiko eta integrala”; 19:30ean hasiko dute.
