'Airetik!', Gazteartean Expo-ren azken proposamena
Ilustrazio formatuan hegazkinetan bizitako une esanguratsuenak islatu ditu Josu Gonzalez gazte irundarrak erakusketa batean. Datorren larunbatetik aurrera, airetik mundua nola irudikatzen duen ikus daiteke Martindozenean.
Dagoeneko zintzilikatu dituzte Josu Gonzalez gaztearen ilustrazioak. Gazteartean Expo programak erakusketa berezi berri bat antolatu du Martindozenea Gaztelekuan. Datorren larunbatetik (hilak 6), ekainaren 1era bitarte, Josu Gonzalez gazte irundarraren obra ikusteko aukera izango da, ‘Airetik!’ izeneko erakusketan.
Txikitatik hegazkinekin erlazio berezia izan du artista irundarrak. “Lan honen bitartez ilustrazio formatuan hegazkinetan bizitako une esanguratsuenak islatu ditut”, azaldu du artista gazteak. Hala, pieza eder ugari zintzilikatu dituzte gaztelekuaren hormetan (orotara, 12). Gainera, obra horietan azken lau urteotako bilakaera artistikoa ere antzeman daitekeela adierazi du Gonzalezek.
Erakusketaz gozatzeko interesa dutenek, astearte, asteazken eta ostegunetan 17:00etatik 20:00etara eta ostiral eta larunbatetan 17:00etatik 21:00etara bisitatu dezakete.
