EAJ: "taldeak hartutako konpromisoari esker, hiriko trenbide gunean lehen urratsak emango dira"
Irungo trenbide guneko azpiegituraren eta erabilerarik gabeko trenbideen altxatzea martxan dela jakinarazi du Iridoyk. "Trenbide abandonatuz beteriko eremua garbitu eta egokitzea" da asmoa.
Xabier Iridoy, gaurko agerraldian. Irungo EAJko bozeramaile eta alkategai Xabier Iridoyk jakinarazi duenez, Irungo trenbide guneko azpiegituraren eta erabilerarik gabeko trenbideen altxatzea martxan da. Aduana kalearen inguruan egingo dituzte lanak (Adif-en geltokiaren atzeko aldean), “trenbide abandonatuz beteriko eremua garbitu eta egokitzeko” asmoz. Estatuko Aurrekontu Orokorretan talde jeltzaleak izandako negoziazioen ondorioa izan dela nabarmendu du Iridoyk.
Era berean, joan den maiatzean taldeak 750.000 euroko akordioa lortu zuela gogoratu du jeltzaleak, “hain beharrezkoa den espazio honen birsorkuntzari hasiera emateko” asmoz. “Herritarren beharrei erantzuteko, eta Irun lehiakor eta aurreratuago bat bihurtzeko, kudeaketa eredu irekiago eta kolaboratiboago baten alde lan egin dugu beti”, adierazi du alkategaiak.
Zenbateko horrek datozen 3 hilabeteotan abandonatutako trenbide horien ezabatzeari hasiera ematea ahalbidetuko duela nabarmendu du alkategaiak, “EAJ taldearen lan zintzoaren errealitetea agerian utziz”.
Dagoeneko obren berri emateko kartela jarri dute.
