[GALERIA] Enbata joan da, baina ez guztiz
Urak dakarrena bertan geratzen delako, boluntarioak behar dituzte etzi, igandez, Hondarribiko Jaitzubiko paduretan egingo duten garbiketarako. Itsas zaborra bilduko dute, bereziki azken enbaten eraginez pilatutako hondakinak, itsasgorekin edota erreken ur emari handien ondorioz iritsitakoak.
Surfrider elkarteak koordinatuko du jarduera Plaiaundiko Txingudi ekoetxea-rekin elkarlanean, eta babestutako gune naturalen zaintza helburu duen Libera programaren barruan kokatzen da. Eusko Jaurlaritzaren Ingurumen Sailak, SEO Birdlife ornitologia elkarteak eta Ecoembes ingurumen erakundeak bat egin dute ekintzarekin.
Garbiketa goizez egingo dute, 10:00etatik 14:00etara. Jaitzubian egingo den arren, jardunaldia Irungo Plaiaundi Parke Ekologikoan hasiko da. Lehenbizi azalpenak jasoko dituzte boluntarioek eta, ondoren, Hondarribiko paduretara mugituko dira ibilgailuz.
Edozeinek parte har dezake jardueran. Hori bai, ezinbestekoa da aldez aurretik izena ematea, ekintza behar bezala antolatzeko. Izena eman nahi duenak posta elektronikoz idatzi helbidera idatzi edo 653 37 15 24 telefono zenbakira deitu behar du.
Mareen eraginpean
Natura 2000 sarean kokatzen diren Txingudi badiako bost eremuetako bat da Jaitzubiko padura, eta izen bereko erreka eta ibarra biltzen ditu, 15 hektarea inguru. Horietatik zati handi bat marea arteko eremuak hartzen du, garrantzia handikoa bertako hegaztientzat eta, batez ere, migrazioetan atseden hartzeko geldialdia egiten dutenentzat.
Baina marearteko eremuaren ezaugarrietako bat horixe bera da, marea igotzen denean itsasoa bertaraino sartzen dela. Eta itsasoarekin batera, hondakinak, itsasgorarekin sartu eta itsasbeherarekin joaten ez direnak. Egoera hori ez da negura mugatzen, baina neguko enbatekin areagotzen da, bai itsasoak, baita errekak ere, barreiatzen duten hondakin kopurua asko handitzen delako. Herenegun eginiko argazkietan antzematen denez, igandean lan handia egin beharko dute garbiketara animatzen diren boluntarioek.
