Eskola Kirola egitasmoaren entrenamenduak urriaren 1eko astean hasiko dituzte. Berritasun bezala, LHko 1. eta 2. mailakoek bertan hasteko aukera dute.
Kirola balioekin eta euskararekin uztartzeko egitasmoa da Eskola Kirola.
Haurrek kirolaz eta euskaraz gozatzeko aukera izango dute aurten ere, Eskola Kirola egitasmoaren bitartez. Irungo Udalak jakinarazi du egitasmoan izena emateko epea zabalik dagoela, hilaren 24ra arte. Izen emateak egiteko hainbat bide daude:
- Irungo ikastetxeetan izena emateko eskuorriak daude.
- Internetez (Irun Txartelarekin).
- Herritarren Arreta Zerbitzuko bulegoan edo Azken Portu kiroldegian. Bertako makinetan egin behar da.
- Informazioa eskatzeko: norberaren ikastetxean, edo 010 (Irundik) edo 943 50 51 52 telefono zenbakietara deituz.
Izena ematen dutenek entrenamenduak urriaren 1eko astean hasiko dituzte (astean bitan). 2019ko maiatzaren 31n bukatutzat emango dute 2018-2019 sasoiko Eskola Kirola. Iaz, esaterako, 600 bat gaztetxo irundarrek parte hartu zuten programan: LHko 3, 4, 5 eta 6. mailakoentzat da ohiko eskaintza, eta aurten, berritasun bezala, LHko 1. eta 2. mailako ikasleek aukera izango dute egitasmoan txertatzen hasteko, astean entrenamendu bat eginez.
Urteko kuota bat ordaindu behar dute parte hartuko dutenek:
- LHko 3, 4, 5 eta 6 mailakoena: 125,95 euro (kuota orokorra). Diru Sarrerak Bermatzeko Errenta jasotzen duten familietako haurren kuota 31,25 eurokoa izango da.
- LHko 1 eta 2 mailakoena: 40 euro. Diru Sarrerak Bermatzeko Errenta jasotzen duten familietako haurren kuota 10 eurokoa izango da.
Irungo Udaleko Euskara eta Kirol sailek kudeatzen dute Eskola Kirola, asmoa euskaraz kirolaz gozatzea delako. Pedro Alegre Kirol ordezkariak kirola eta hizkuntza uztartzeko zeregin horretan sakondu du, esanaz egitasmoaren bidea haurrek aukera dutela euskara erabiltzeko, betiere euren adinera egokitutako kirol espezialitateak jorratuz. Monica Martinez Euskara ordezkariaren arabera, “talde lanaren eta elkarbizitzaren balioak sustatzeko ere tresna da Eskola Kirola, gelatik kanpo euskararen erabilera bultzatuz”.