Datorren larunbatean (hilak 26) pentsio duinen alde Donostian egingo duten manifestazioan izango dira berriz ere. 17:30ean ekingo diote mobilizazioari.
Bigarrenez Donostiako manifestazioan izango dira Txingudiko pentsiodunak.
Manifestazioa egingo dute datorren larunbatean (hilak 26) Gipuzkoako pentsionistek Donostiako kaleetan barrena. 17:30ean, Londres Hotelaren ondoan dagoen plazatik abiatuko dira.
Bertaratzeko deialdia luzatu dute Txingudiko Pentsiodunen Mugimenduko kideek. Pentsiodun, langile eta gazteen presentzia “beharrezkoa” dela nabarmendu dute, eta Irun, Hondarribia eta Hendaiako herritar oro gonbidatu dute mobilizazioan parte hartzera. “Asko dugu jokoan”, adierazi dute elkartetik, eta egoerari buelta emateko kaleak bete behar dituztela aldarrikatu dute.
Ondorengoak dira, Txingudiko pentsiodunek datorren larunbatean oihukatuko dituzten aldarri nagusiak:
- Pentsio publiko duin batzuen alde.
- Pobreziaren atalasetik behera inolako pentsiorik ez. Euskadin 1080 €-koa izatea.
- Jasangarritasun faktorearen deuseztatzea.
- Pentsio pobreak sortzen duten lanei ez.
