Torturaren Aurkako Egunaren harira (hilak 13), Kalera Kalera dinamikak zenbait jarduera antolatu ditu Irunen hilaren 13 eta 17rako.
Irungo San Juan plazan egin dute gaurko agerraldia.
Datorren asteartea (hilak 13) Torturaren Aurkako Eguna da. Aldarrikapen egun horren harira, Kalera Kalera dinamikak ekitaldiz beteko ditu Euskal Herriko herriak. Irunen ere torturatu guztiak gogoratuko dituzte, bi astez jarraian. Gaur aurkeztu du egitaraua torturak jasandako Jaunra Rojo irundarrak. Harekin bat, Oarsoaldeko zenbait torturatu izan dira.
Bertan, lehenik, tortura “sistematikoa” izan dela salatu du, eta “korapilo hori askatu ezean” normalizaziorik ez dela posible izango. “Urteak pasa dira torturatu gintuztenetik, bizipen horiek mingarriak baldin badira, are mingarriagoa da oraindik errekonozimendurik ez dugula; existitu ez balitz bezala”, adierazi du. Torturatu guztiek “justizia” behar dutela esan du, bakean eta bizikidetzan oinarritutako herri bat eraikitzeko, “gatazkaren ondorio guztiei” erreparatu behar zaiela.
Aitortza eta erreparazioa
Aitortza behar dute torturatuek. Hori izan da gaurko bigarren aldarri nagusia. Horretarako, Espainiako Estatuko eta Euskal Autonomia Erkidegoko administrazioek “behingoz” herritarrak “modu sistematikoan” torturatuak izan zirela “publikoki” onar dezatela eskatzen dute Kalera Kalera dinamikatik. “Hemen milaka torturatu zituzten”, salatu du. Guztira, Eusko Jaurlaritzak enkarguz egindako txostenak 4.113 tortura kasu egiaztatu dituela argitu du, eta “konplizitateak asko” izan zirela “inpunitate osoa izateko”. Bestalde, “oinaze handia” pairatu ondoren, erreparazioa behar dutela adierazi du Rojok. Kaltea “egina” dagoela nabarmendu du, baina erreparazioak “gure mina arintzen lagunduko” duela ere azaldu du.
Gainera, torturapean lortutako testigantza guztiak “baliogabetzea” eskatu dute gaur Irunen. Ondorengo esaldiarekin amaitu du agerraldia Juanra Rojok: “Torturak ez zuen inoiz gertatu behar. Ez errepikatzeko bermeak eskatzen ditugu. Ezin da berriro gertatu”.
Irungo ekitaldiak
Tortura, aitortzatik harago titulupean izendatu dituzte datozen asteetan Irunen jorratuko dituzten jardunaldiak. Ondorengoa da egitaraua:
- Otsailak 9: Iratxe Sorzabal irundarren epaiketara bidaia. Bihar gauean (hilak 8) abiatuko da busa eta ostiralean itzuli.
- Otsailak 13: Torturaren Aurkako Egunaren harira, hitzaldia antolatu dute Palmera Montero Gunean (19:30). Bertan, Euskal Memoria Fundazioko Iñaki Egañak eta torturatua izandako Nekane Txapartegik hitzaldia eskainiko dute.
- Otsailak 17: ekitaldi nagusia egingo dute Urdanibia plazan (13:00). Antton Lope eta Jose Schulmanek gidatuko dute saioa.
