Bost zauritu Hondarribiko etxe batean sortutako suteagatik

Soroetagain kaleko 3. atariko etxebizitza batean izan da sutea. Zaurituetako bat Gurutzetako ospitalera eraman dute, erredura larriekin.

2018/02/02

Urko Etxebeste

Bigarren pisuko etxebizitza batean izan da sutea.

Sutea izan da goizean Hondarribian, Soroetagain kaleko 3. atariko bigarren pisuko etxebizitza batean. Suhiltzaileek adierazi dutenez, bost zauritu izan dira: lau Bidasoko Ospitalera eraman dituzte kea arnasteagatik, eta bosgarrena, aurpegi aldean izan dituen erredura larriengatik, Barakaldoko (Bizkaia) Gurutzeta Ospitalera eraman dute helikopteroz. Goizeko bederatziak pasata jaso dute deia suhiltzaileek, Soroetagain kaleko 3. sotoko bigarren solairutik jaso dute deia, etxean sutea zutela esanez. Iritsi direnerako, beste bi bizilagun aurkitu dituzte laugarren solairuko balkoian laguntza eske, kearen eraginez ezin izan dutelako eskaileratik jaitsi. Ibilgailuko eskaileratik jaitsi dituzte bi horiek, baita sutea izan den etxebizitzako bizilagunetako bat, aurpegi aldean erredurak izan dituena. Gainontzeko bizilagunek eskaileratik atera dira euren etxeetatik. Bidasoko eta Donostiako estazioetako suhiltzaileek parte hartu dute sutea itzaltzeko eta bizilagunak erreskatatzeko operazioan. Txomin Sagarzazu alkateak HITZAri azaldu dionez, eraikina zigilatu egin dute, eta dagoeneko ostatua bilatu diete etxera bueltatu ezinda geratu diren kaltetuei. Bizilagunetako bat, Eguneko Zentroko erabiltzailea dena, Irungo Caser erresidentzian geratuko da lotan. Oraindik ez daude guztiz zehaztuta sutearen arrazoiak. Litekeena da gas isuri bategatik sortu izana.

Azken berriak

Harpidetu zaitez gure buletin irekira!
Asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.