Denis Itxaso Kirol diputatuak Uranzu bisitatu du gaur goizean. Pilotalekua hiriaren erreferente izaten jarraitzeko ezinbestekotzat eman ditu berritze lanak.
Santano eta Itxaso, Bidasoako eta Kurpil Kirolak-eko kideekin gaur Uranzun.
Gipuzkoako Foru Aldundiak 600.000 euro jarriko ditu Irungo Uranzu pilotalekua berritzeko lanak finantzatzeko. Lanen kostu osoa 4,5 milioi eurokoa da. Iragarpena Denis Itxaso aldundiko Kirol diputatuak egin, du, gaur Uranzura egin duen bisitan.
Harekin Irungo alkate Jose Antonio Santano, eta pilotalekua gehien erabiltzen dutenen elkarteen ordezkariak izan dira, alegia, Bidasoa eskubaloi taldeko presidentea nahiz Kurpil Kirolak elkarteko ordezkaria.
Itxasok esan duenez, aldundiak kirol instalazioak berritzeko duen planaren barrukoa da diru laguntza, gipuzkoar orok kirolaz goza dezaten diseinatutakoa. Plan horrek instalazioen berritzeak lehenesten ditu, berriak egitearen aurrean. Gainera, energia arloan, instalazio iraunkorragoa izango da Uranzu behin lanak amaituta. “Irunentzat instalazio enblematikoa da Uranzu. Baina zaharkituta gelditu da, eta berritzea behar du irundarrek hortaz goza dezaten”.
Irungo alkateak esan duenez, Uranzuren berritzea, frontoia dagoen ingurune guztiaren birmoldatzearen osagarri izango da. Izan ere, Urdanibia plaza nahiz San Martzial kale eraberrituei, Uranzu eta Sargia parkea erantsiko zaizkie alde zaharraren hirigintza iraultza horretan. “Uranzuk izango duen aldaketarik nabarmenetakoa da sarrera tokiz aldatuko dela, Sargiatik egingo delako”, zehaztu du alkateak.
Horrez gain, azpiegitura berrituaren diseinuan genero ikuspegia kontuan hartu dela esan du alkateak, bai espazioen antolaketari dagokionez, bai eta argiteriaren ikuspegitik ere.
Aste honetan bertan hasi dira Uranzuko lanak. Junkal kalean babeserako hesiak jarri dituzte.
Instalazioak kanpotik eta barrutik itxura bakarrik ez, eserlekuen kopuruan onura izango du: 727 eserleku izango ditu gehienez, eta kirol jardueraren arabera, jasotzen diren eserlekuek espazio gehiago edo gutxiago emango diote kantxari (19,85×43 metrokoa). Pilota partidetan eserleku guztiak prest egongo dira. Beheko estekan informazio gehiago.
