Zaporeak proiektuak, beste behin, Greziako errefuxiatuei laguntza bideratzeko, elikagai bilketak antolatu ditu Irun eta Hondarribian, hilaren 13 eta 14an.
Zaporeakeko kideek joan den otsailean Greziara gatz mordoa eta bestelako elikagaiak bidali zituzten.
Zaporeak proiektuak, beste behin, Greziako errefuxiatuei laguntzeko elikagai bilketa antolatu dute hilaren 13 eta 14rako (09:00etatik 21:00etara). Egun, Patras eta Atenasen daude Zaporeak-eko kideak, Food Kind Patras eta SOS Refugiados Atenaseko Victoria Social Centerekin elkarlanean. Horien helburua, martxan jarri dituzten sukaldaritza proiektuetan laguntzea izango da, “errefuxiatuei otordu duin bat eskaintzen jarraitzeko asmoarekin”.
Proiektu berrirako, elikagaien bilketa ezinbestekoa dute. Bilketa bat jarriko dute martxan, eta horretarako, bidasoarren laguntza eskatu dute. Biltegia hornitzen joateko, datorren ostiral eta larunbatean, Irun eta Hondarribiko BM supermerkatuetan, pasta, arroza, lekari lehorrak, arrain kontserbak, kontserba begetalak edota olioa bezalako elikagaiak jaso nahi dituzte. Ondorengoak dira BMren denda horiek:
- BM Neto Irun, Almirante Arizmendi kalea, 9.
- BM Palmera Irun, Leandro Agirretxe plaza.
- BM Hondarribia, Rebellin kalea 3-4.