Lapurriturriko Informazio Puntuak, hilaren 22rako, onddo eta perretxikoak non eta nola bilatu ikasteko jardunaldia antolatu du.
Hilaren 22an egingo dute onddo eta perretxikoen inguruko txangoa.
Lapurriturriko Informazio Puntuak beste jardunaldi berri bat antolatu du. Hurrengo astean, hilaren 22an zehazki, onddo eta perretxikoen mundua ezagutzeko txango berezia antolatu dute. Jesus Maria Orcajo mikologoaren laguntzarekin, partaideek Lapurriturri inguruan onddo eta perretxikoak non eta nola bilatu ikasiko dute, jangarriak diren ala ez ezagutzeko, besteak beste.
Jardunaldian parte hartzeko, interesdunek gaurtik hilaren 19ra bitarte, Irungo Udaleko web orrialdean edota 010 telefono zenbakian eman beharko dute. Gehienez, 20 pertsonek izango dute aukera parte hartzeko. Mendiko arropa eta erosoa eramateko deialdia luzatu dute antolatzaileek. Irteera 10:00etarako aurreikusi dute.