San Pedro kalean elkarretaratuko da gaur Gure Esku Dago
Katalunian greba orokorra egiten ari dira eta Euskal Herrian babesa adieraziko diote hango prozesuari. 22:00etan kazerolada egingo da, eta itzalaldia.
Katalunian deituta dagoen greba orokorrarekin bat eginez, elkarretaratzeak egingo ditu Gure Esku Dagok gaur arratsaldean, hango autodeterminazio prozesuari babesa adierazteko eta igandeko erreferendumean Espainiako gobernuak burututako errepresioaren kontra protesta egiteko.
Hondarribikoa 19:00etan egingo da, San Pedro kalean. Erabakitzeko eskubidearen aldeko plataformako Hondarribiko taldeak “herritarrei, talde politikoei eta sozialei” dei egin die gaur arratsaldeko ekitaldira batu daitezen. Dagoeneko Abotsanitzek eta EH Bilduk bat egin dute deialdiarekin.
Eguerdian, udal langile talde batek kontzentrazioa burutu du udaletxeko arkupeetan. Enpresa batzordeak egin du deialdia, “Kataluniako herriari babesa adierazteko” eta, langileekin batera, Abotsanitzeko ordezkari bat izan da ekitaldian.
Kazelorada, 22:00etan
Joan den igandeko gertakariak salatzeko sare sozialen bidez deituriko kazerolada zaratatsuaren ondotik, gaur gauerako ere zabaldu da deialdia, kazerolada eta itzalaldia egiteko. Deitzaileek, 22:00etan argiak itzaltzeko eta lapikoekin zarata egiteko eskatu diete, Kataluniako herritarrei elkartasuna adierazteko.
Irailaren 24an Kataluniako erreferendumari babesa eman zioten San Pedro kalean
Erlazionatutako edukiaErrepresioari lapikoekin erantzun diote hondarribiarrek
