Errepresioari lapikoekin erantzun diote hondarribiarrek
Katalunian 844 zauritu eragin zituen errepresioaren kontrako kazerolada egin dute Hondarribian. Sare sozialen bitartez egindako deialdia Euskal Herri osora zabaldu zen.
Atzoko erreferendum egunean Espainiako Gobernuak Katalunian poliziaren bitartez eragindako errepresioaren kontrako burrunba handia izan zen gauean Euskal Herrian. Sare sozialen bitartez egin zen deialdia, 22:00etan kazeroladak egiteko. Hondarribian erantzuna handia izan zen, eta deialdiaren berri ez zutenak ezustean harrapatu zituen.
Facebook sarearen bidez eginiko galdeketari esker jakin izan dugu behintzat Portuan, Alde Zaharrean, Zezen plazan, Biteri inguruan, Muliaten, Soroeta inguruan eta Labrederren entzun zela errepresioaren kontrako eta herri katalanarekiko elkartasuna adierazteko kazerolada. Batzuk kalera jaitsi zituzten lapikoak, beste askok euren etxeetako leiho edo balkoitik erantzun zioten sare sozialen bitartez zabaldutako deialdiri.
Kataluniako osasun zerbitzuek emandako datuen arabera, gutxienez 844 zauritu izan ziren atzoko hauteskunde egunean. Espainiako Poliziak eta Guardia Zibilak indarkeria handia erabili zuten erreferenduma galarazteko, eta 700 bozkalekutan ezin izan zen botorik eman. Halere, bi milioitik gora herritarrek bozkatu zuten (2.262.424), eta %90a baiezkoaren alde agertu zen (2.020.144), %7,8a kontra (176.566), boto zuriak %2a izan ziren (45.586), eta baliogabeak %0,8a (20.129).
Irakurri albistea BERRIAn
Polizi bat atzo, hautetsontzi bat lapurtu nahian (iturria: Twitter)
