Ekainaren 30eko desfilearen harira, Alarde Publikoaren Batzordeak balorazioa egin du.
Ekainaren 30eko Alarde Publikoaren desfilearen irudi bat.
Joan den ekainaren 30ean, San Martzial egunean,
Alarde Publikoak Irungo kaleak zeharkatu zituen. Egun horren harira, Alarde Publikoaren Batzordeak balorazioa egin du.
Lehenik eta behin, “bihotz-bihotzez” eskerrak eman nahi izan dizkiete “alarde barruan edo espaloietatik txaloka gurekin egon diren guztiei”. “Harro-harro” azaldu dira, lehenago emakumeek aukera hori ez zutela jakinik, emakume gazteak “emozioz eta pozez” desfilatu zutelako. “Ausardiaz” desfilatu zutela esan dute, “ongi zaila izaten ari delako oraindik ere Alardean herrikide gizonezkoekin batera berdintasunez desfilatzeko eskubidea” bermatzea. Musika ondo jotzeko, pausua behar bezala eramateko, agintariek unitateak txukun eramateko eta zaldi gainean trebe eta dotore jarduteko “den-denek ahaleginak eta bi egin” dituztela txalotu dute, “publikoaren errespetua bereganatu nahian”.
Dagoeneko, “berdintasunaren alde” milaka pertsona badirela gogoratu dute. “Gustuko dugun Alardea egitea lortu dugu”, gehitu dute, “jai egun ezin alaiagoz gozatuz eta erritmoa eta festa bateratuz, irundartasuna” berretsi dutela. Gainera, Emakunde, Arartekoa, Gipuzkoako Foru Aldundia eta hainbat alderditako ordezkariei udaletxean harrera egiteagatik eskerrak eman eta zoriondu nahi izan dituzte. Azkenik, Jose Antonio Santano alkatea, PSE-EE, EAJ eta PPko zinegotziei kritika egin diete, “emakumeak baztertzen dituen Alardeari” soilik harrera egiteagatik.