Lehen Mailara igotzeko azken fasea jokatuko du Ikasbasketek. Sailkatu izanarekin konforme dira, baina dena ematen bukatu nahi dute.
Bi jokalari gutxiagorekin entrenatu dute aste honetan. Argazkia asteazkenekoa da
Express Hondarribia Ikasbasket saskibaloi taldeak Espainiako Lehen Mailara igotzeko lauko finala jokatuko du asteburuan Getxon. Etxekoak dira faborito, hondarribiarrek denboraldia ospatzera bidaiatuko dute, baina ez dute ezer baztertzen. Bihar dute finalerdia, 16:00etan, Logroñoko San Ignacio Venueren kontra (
ikusi lauko finalaren egutegia).
2014an jaio zen Hondarribia Ikasbasket, eta urtebetera jarri zuten martxan nagusien taldea, beheko mailetatik zetozen haurrek nagusitan ere jokatzen jarraitzeko aukera izan zezaten.
Garai batean emakumeen saskibaloi profesional talde batek jokatzen zuen Hondartza kiroldegian, baina azpiko egiturarik ez zuen; dirua bukatu zenean, proiektua desagertu zen.
Ikasbasketena, aldiz, harrobiko proiektu gisa sortu da, helburu argia duena: Hondarribiko neska-mutilek maite duten kirolaz gozatzeko aukera izatea. Lehen urtean talde guztiak neskenak ziren arren, dagoeneko mutilen bi osatu dituzte. Hori bai, nagusien taldea da Ikasbasketen erreferentzia nagusia, eta urte batzuetara bertan jokatzeko irrikaz entrenatzen dira astero dozenaka neska hondarribiar. Getxon gertatzen denaren adi egongo dira asteburuan.