Olinpiadak parrokiaraino sartuko dira larunbatean
Olinpiadetako hirugarren proba egingo dute larunbat arratsaldean Alde Zaharrean. Goizerako bisita gidatua antolatu dute gazteek, parrokia ezagutzeko.
Ez eguraldi txarra espero delako, ez altxorraren bila ariko direlako, ezta Ur Karruxak emanaldi bira hasi behar duelako ere… Ez, ez. Nahi dutelako egingo dute, herriko ondarea hobeto ezagutzeko. Alde Zaharreko parrokiara joango dira olinpiadetako kideak larunbat goizean, bisita gidatua egitera.
Ginkana proba egingo dute larunbatean, baina arratsaldez. Arma Plazan eta Apezpiku plazan egingo dituzte probak eta eguerditik antolatzen ariko dira. Bada, hori aprobetxatuta, Jasokundeko eta Sagarrondoko Andre Mariaren tenpluan bisita gidatua antolatu dute gazteek. Aritz Diez Oronozek hartuko ditu gidari lanak, Arma Plaza Fundazioarekin elkarlanean. Euskal Kostaldeko Museoen hilabetearen barruan, bi bisita gidatu antolatu ditu Arma Plazak larunbat goizerako —11:00etan euskaraz eta 12:30ean gaztelaniaz—, eta olinpiadek eskatuta, hirugarren bat egingo dute, gazteei begira.
Printzipioz, 10:30ean izango da bisita hori, ate nagusian hasita —aldaketarik egonez gero, olinpiadetako Facebookean iragarriko dute —, eta izena eman nahi duenak posta elektronikoz egin behar du.
A! Norbaiti ahaztu bazaio, Kale Nagusian dago eliza, Wamba tabernaren parean dagoen eraikin hori da, eskailerak dituena. Badaezpada.
Olinpiadetako hirugarren proba Alde Zaharrean denez, eliza ezagutzeko baliatuko dute
Erlazionatutako edukiaUr karruxaren izenean, amen!
