Solas Jolas, ordubete luzeagoa aurten

Solas Jolas egitasmoaren barrukoak 09:00etatik 13:00etara izango dira. Bi txanda daude, uztailaren 4tik 28ra, eta abuztuaren 2tik 25era.

Urko Etxebeste Petrirena

Irun

2017/03/07

Arantza Zulet eta Josune Gomez, gaurko aurkezpenean.

Irungo Udalak aurkeztu du aurtengo Solas Jolas. Udaleku irekiak dira, Josune Gomez Euskara ordezkariak esan duenez, “haurren artean euskararen erabilera sustatzeko eta hizkuntzarekiko haurren jarrera hobetzea” dute helburu. Berritasun nabarmen bat du aurtengo Solas Jolasek: ordubete gehiago iraungo dute eguneko, 09:00etatik 13:00etara. Bi txanda izango ditu aurten jarduerak: lehena uztailaren 4tik 28ra da; bigarrena abuztuaren 2tik 25era. Gaur aurkeztu dute 2017ko Solas Jolas Josune Gomezek berak, eta Hizkuntza Normalizaziorako teknikari Arantza Zuletek. Zabalik dago izena emateko epea, eta hilaren 17ra arte egongo da irekita aurrematrikulazio epealdia. HHko 4 eta 5 urtekoentzako, nahiz LHko lehen mailatik laugarren maila bitartekoentzat da (2007 eta 2012 urteen artean jaiotakoak); LHko bosgarren eta seigarren mailan dauden eta dibertsitate funtzionala duten haurrek ere badute izena emateko aukera, 12 urteko mugarekin. Irungo Udalaren webgunean, HAZeko autozerbitzu terminaletan (08:00etatik 22:00etara), edo 010/943 50 51 52 telefonora hots eginda (astelehenetik ostiralera, 08:00-20:00) egin daiteke aurrematrikulazioa. Hainbat datu eskatuko dizkiete bertan interesdunei. Ondoren, onartuen eta baztertuen zerrendak publikatuko dira, martxoaren 27an zehazki (udalaren webgunean), eta apirilaren 10ean plazen zozketa egingo da.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.