Abenida-Plaiaundi bidegorria, egi izateko bidean

Jaurlaritzak esleitu egin du egitasmoa idazteko proiektua. Bidegorria eta oinezkoen bidea da egin asmo dena. Aspaldiko eskaera da.

Urko Etxebeste

Irun

2017/03/07

EAJk landu zuen proposamenaren irudia.

Abenida zubia eta Plaiaundi lotuko dituen bidegorria eta oinezkoen bide berria egiteko egitasmoak urrats sendoa eman du aste honetan: proiektua idazteko lana esleitu egin du Eusko Jaurlaritzak, eta hala jakinarazi dio Irungo Udalari. “Berri oso ona da. Urrats garrantzitsua eman da aurki errealitate bihurtzeko”, esan du Cristina Laborda Mugikortasun ordezkariak. Bidegorriak eta oinezkoen pasabideak hiriaren mugikortasun mapa, nahiz ingurumenarena asko hobetuko duela uste du udalak. Labordak oroitarazi du Abenida-Plaiaundi egitasmoa ez dela isolatua. Izan ere, Hendaia-Irun-Hondarribia ardatzean aurten hainbat aurrerapauso izango direla ohartarazi du, Letxunborro hiribideko bidegorria, edo Ospitaleko biribilgunekoa kasu. Miguel Angel Paez Garapen Iraunkorrerako ordezkariak, bere aldetik, begi onez ikusi du egitasmoak ingurumen aldetik izan ditzakeen onurak: “Iraunkortasunaren aldetik ere beharrezkoa da egitasmoa. Horrela, Plaiaundiz gozatzeko aukera izango dute herritarrek, era iraunkor batean”. Iridoy ere ados Xabier Iridoy Irungo EAJren udal taldeko bozeramaile eta Hirigintza ordezkaria ere pozik agertu da Jaurlaritzak egin dituen urratsekin. Oroitarazi du, hura oposizioan zela, 2013an, Behe Bidasoko hiru udalerriak lortuko zituen proposamena landu eta helarazi ziola Jaurlaritzari, “guk egindako lanak eragina izan duela ikusteak pozten gaitu”. Egitasmoa garatzen denean irundarrek eta edonork naturaz gozatzeko aukera zabalagoa izango dutela uste du Iridoyk, hau da, egitasmoa egitea hiru udalerriak bizikletaz lotzea baino askoz gehiago dela.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.