Irungo Eskola Kirola, hastear

Hilaren 16ra arte eman daiteke izena Eskola Kirola egitasmoan.

2016/09/14

Pedro Alegre eta Josune Gomez gaurko agerraldian.

Irungo Eskola Kirola egitasmoak badu bide orria. Hasteko: izena emateko epea etzira arte (ostirala, hilak 16) zabalik dago, hiriko ikastetxeetan. Bertan izen emate orria eskatu, bete, eta entregatu behar da. 121 euroko prezioa du parte hartzeak; Diru Sarrerak Bermatzeko Errenta jasotzen dutenek 30 euroko kuota izango dute. Irungo Udalaren webgunean ere eman daiteke izena (Irun Txartela erabiliz), baita HAZ bulegoan edo Azken Portu kiroldegian ere. Informazio gehiago ikastetxeetan edo 010 (Irundik) edo 943 50 51 52 telefono zenbakietara deituz lor daiteke. Urriaren 4an hasiko dira jarduerak. Azkenak 2017ko maiatzaren 31n egingo dituzte. Gaur aurkeztu dute 2016-2017 sasoiko Eskola Kirola. Hazten duen kirola leloa ezarri diote udaleko kideek egitasmoari, “haurrak bizikidetzaren balioetan hezi, kirola egoki egiten ikasi, eta eskola orduz kanpo euskararen erabilera sustatu” nahi dituztelako bertan Josune Gomez Euskara ordezkariak azaldu duenez. Pedro Alegre Kirol ordezkariak nabarmendu du aurten ere Kirol Egokituaren Gipuzkoako Federazioarekin elkarlanean egingo dituztela hainbat jarduera, “haur guztiek ariketa fisikoa egiteko aukera berdinak izan ditzaten, bere baldintza fisiko, kultural edo ekonomikoa edozein izanda ere”. Aurreko ikasturtean dibertsitate funtzionala zuten 19 haurrek parte hartu zuten programan. Aurten kopuru hori haztea espero dute. Ohiko kirolak eta berriak uztartuko dituzte Eskola Kirola egitasmoan. Horiek egiten 516 haur izan ziren iaz, gehienak mutilak. “Lanean jarraituko dugu kopuru horiek parekatzera irits daitezen”, esan du Josune Gomezek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.