Klink elkarteak beste bazkari solidario bat egin zuen larunbatean. Indiako Anantapur eskualdean bi etxebizitza egiteko adina diru bildu zuten
Bazkaria egin zuten boluntarioak, eta Vicente Ferrer elkarteko kideak, larunbatean
Klink elkartearen elkartasun otorduek emaitza bikainak ematen jarraitzen dute. Esaterako, joan den larunbatean Vicente Ferrer fundazioaren aldeko bazkaria egin zuten Alde Zaharreko elkartean. Bertan, orotara, 4.000 euro bildu zituzten: Indiako Anantapur guneko zonalderik txiroenean bi etxebizitza egin ahal izango dituzte ditu horrekin.
Larunbateko bazkarian, orotara, 100 pertsona bildu ziren, 85 heldu eta 15 haur. Bazkaldu bakarrik ez. Vicente Ferrer fundazioko Hasina Syed ere elkartean izan zen, zuzenean bertaratutakoei kontatzeko zein egoera bizi duten Anantapurren. Montxo Ferrer (Vicente Ferrerren semea) ere izan zen ekitaldian, hark esker on hitzak izan zituen bazkarian bildutakoentzat: “Gure helburua da familiak duintasunik gabeko etxoletatik atera, eta etxebizitza duinak eraikitzea eta ematea”. Etxebizitzak emakumeen izenean eskrituratzen dituzte, horrela ahalbidetuz bertako emakumeen ahalduntzea, eta gizarte presentzia.
Sport Mundik ere ekarpena egin zuen larunbatean.
Klink-ek aurten hainbat elkartasun otordu egin ditu. Horietan bildutako diruaren berri eman du elkarteak. Orotara, horietan, 14.000 euro bildu dituzte. Honakoak dira:
- San Filippo gaitza dutenei laguntzekoan, 1.800 euro bildu zituzten.
- Salvamento Maritimo Humanitario laguntzeko (Siriako errefuxiatuekin ari dira lanean), 2.900 euro.
- Domiz-eko kanpalekuan dauden Siriako errefuxiatuen alde 300 euro bildu zituzten.
- Caritasen, Elikagai Bankuaren eta Betharram parrokiaren alde 1.400 euro bildu zituzten.
- Siriako errefuxiatuei arropa erosteko (Emekiren iniziatibarekin bat eginez) 3.300 euro bildu zituzten.
- Indian etxebizitzak egiteko 4.000 euro bildu dituzte.
