Hondarribiko Marlaxkako Patxi Moreno eta Grosen ari den Cecilia Perez irundarrek Euskadiko Xake Txapelketa irabazi dute.
Dorronsoro eta Moreno, Eibarren
Haur, Kadete eta Gazte mailetako Euskadiko Xake Txapelketa egin dute asteburuan Eibarren eta bi irundar igo dira podioko gorenera, Hondarribiko Marlaxka Xake Elkarteko Patxi Moreno eta Gros taldeko Cecilia Perez.
Emaitza onenak Patxi Morenok lortu zituen.
Iaz bezala, Haurren Mailako txapelketa irabazi zuen Morenok, eta, horrez gain, kadeteetan hirugarren geratu zen.
Cecilia Perez, jertse grisaduna, Groseko kideekin
Kadeteetan ere, beste irundar batek irabazi zuen emakumeen lehiaketa, Cecilia Perezek. Donostiako Gros Xake Taldean lehiatzen da Perez.
Gazte Mailan, Marlaxkako beste kide bat, Ibai Dorronsoro, laugarren sailkatu zen. Irundarra da Dorronsoro ere, egungo
Gipuzkoako txapelduna gazteetan.
Gainontzeko irabazleak honakoak izan ziren: Jon Lagoa (Gazte Maila), Adrian Martinez (Kadete Maila) eta Estibaliz Apellaniz (Haurren Maila). Maila Absolutuko txapelketa ere egin dute asteburuan, Zornotzan. Santiago Gonzalez de la Torre Groseko donostiarrak irabazi du 2016ko Euskadiko Xake Txapelketa.
Asteburua ligako azken jardunaldia
Cecilia Perez eta Ibai Dorronsoro Maila Gorenean lehiatzen dira Gipuzkoako ligan. Patxi Moreno, berriz, Lehen Mailan aritzen da. Datorren astean bukatuko da Gipuzkoako Xake Liga eta, Maila Gorenean, Marlaxka bigarren postua lortzen saiatuko da, baina ez du erraza izango. Izan ere, Iriondo A-ren emaitza hobetu behar dute hondarribiarrek, eta, printzipioz, zarauztarrek lehia errazagoa dute.
Ikusi ligako sailkapena