Paella olinpikoa, hurrengo erronka
Aro modernoko Hondarribiko III. Herri Olinpiaden hurrengo proba egingo dute hilaren 9an. Sukalde lanetan, paella onena egiten saiatuko dira 400 lagun. Prestatutakoak mahaiaren bueltan disfrutatuko dituzte ondoren.
Aro modernoko III. Herri Olinpiadetan murgilduta daude hondarribiarrak. Horien barruan, hurrengo larunbatean (hilaren 9an) izango dute hurrengo hitzordu handia. Paella lehiaketa da olinpiaden barruan antolatu duten hurrengo erronka. Pozik daude antolatzaileak, 400 lagunek eman baitute izena parte hartzeko. Putteruan Alabak, Klaro Kon Gas eta Josu Belea Makil Idorrean taldeak ari dira proba horren antolaketa lanean. Azken talde horretako kidea da Telmo Flores, baikor azaldu da lehiaketak izan duen erantzunarekin: «Lehenengo aldia da paella lehiaketa antolatu dugula. Aurretik, aro modernoko lehen olinpiadetan, proba gastronomikoa egin genuen, pintxo lehiaketa zehazki, baina halakorik ez dugu antolatu orain arte».
Olinpiadetan arrakasta gehien izaten duten egunak bazkariak antolatzen dituzten egunak direla esan du Floresek, «horren harira iruditu zitzaigun halako proba bat antolatzea ongi legokeela. Bazkaria egiten dugunean talde ezberdinak arduratzen dira hura prestatzeaz eta lan handia izaten dute. Proba honekin, lehiaketa egin eta ondoren afaria egiteko baliatuko ditugu prestatutako paellak».
Jakia egiteko osagaiei ez diete mugarik jarri, «talde bakoitzak erabakiko du zein osagai erabili nahi dituen lehiaketarako». Hori bai, aurretik prestatutakorik ezingo dute erabili sukaldariek, «baldintza bakarra da guztia bertan prestatzea. Salda, adibidez, prestatuta eramateko aukera izango dute, baina gainontzekoa bertan egin beharko dute», esan du Floresek.
400 parte hartzaile
Momentuz arrakastatsua izaten ari da lehiaketaren prestaketa. Martxoaren 19an amaitu zen izena emateko epea, eta laurehun lagunek egin dute bat paella lehiaketarekin. Hitzordurako gonbidapen berezia egin diete, gainera, 1980eko eta 1990eko hamarkadetako herri olinpiadetan aritu ziren garaiko gazteei: «Garai hartako 100 lagunek eman dute izena eta aro modernoko olinpiadetan ari diren 300 lagunek. Beraz, pozik gaude emaitzarekin momentuz».
Parte hartuko duen talde bakoitzak, bere taldekideek jateko adina paella egin beharko dute. Taldeen osaera ere ezberdina dela gaineratu du Josu Belea Makil Idorrean taldeko kideak, «talde batzuk 10 lagunez osatuta daude, baina badaude 30 lagun dituztenak ere».
Kaleak bizirik mantendu
Hilaren 9ko arratsaldeko seietan piztuko dituzte suak. Orduan hasiko dira sukaldatzen parte hartzaileak paella onenaren bila. Zain izango dituzte Hondarribiko ostalariek osatutako epaimahaiko kideak, denak dastatzeko eta epaia emateko. Zailena, lehiaketa bera martxan jartzea izan dela aitortu du Floresek, «behin hasita nahikoa erraz doa guztia».
Lekua aukeratzerako zailtasunak izan dituzte, gazteak azaldu duenez: «San Pedro kalean egin nahi genituen lehiaketa eta afaria hasiera batean, baina udalak esan zuen jende gehiegi ginela bertan sartzeko, eta azkenean Arrantzale Auzoan egingo dugu». Arroza kiloka enkargatu dute egun horretarako, baina eguraldi ona ere eskatu omen dute, «aterperik ez dago, beraz, espero dezagun eguraldia lagun izango dugula».
Olinpiada modernoak aurrerapausoa izan direla zalantzarik ez du Floresek, «garai batean egiten zirenak berrartzea garrantzitsua izan da gure herriarentzat. Herri olinpiadek indarra dutela erakutsi dute». Oraindik parte hartzera animatu ez direnei ere bidali die mezua, «oso ongi pasatzen da, jende asko ezagutzen duzu eta Hondarribiko kaleak bizirik mantentzeko bidea dira. Hondarribiko elkarbizitzan ezer ez izatetik herri olinpiadak izatera heltzea, eta hainbeste jende biltzea haien inguruan, urrats garrantzitsua izan da». 
