Buru osasunari buruzko uste okerrak baztertuko ditu Agifes-ek Kultur Etxean
Veronica Pazos, Agifes elkarteko gizarte-langileak Estereotipoak baztertu. Buru osasunaren inguruko egi eta uste okerrak goiburuko hitzaldia emango du hilaren 29an Hondarribian.
Veronica Pazos, Agifes elkarteko gizarte-langileak Estereotipoak baztertu. Buru osasunaren inguruko egi eta uste okerrak goiburuko hitzaldia emango du hilaren 29an (osteguna) Hondarribiko Kultur Etxean (Denda kalea, 18). Gaztelaniaz izango da hitzaldia eta 18:30ean hasiko da, 103. aretoan. Buru Gaixotasuna duten Pertsonen eta Senideen Gipuzkoako Elkartea da Agifes, eta bere helburuak buru gaixotasuna duten pertsonak gizarteratzen eta komunitatean barneratzen lagundu; kalitatezko zerbitzuak aldarrikatu eta buruko patologia larriak dituzten pertsonen eta senideen bizi-kalitatea hobetzea dira.
Veronica Pazosen hitzaldiak, “buru gaixotasunaren errekuperazio prozesuaren ikuspegi baikorra eman eta uste okerrak baztertzeko” balioko duela adierazi du Agifesek. Saio praktikoa izango da eta Pazosek estigma gainditzeko eta nahasmendu psikikoaren gizarte-ikuspegia normalizatzeko jarraibideak emango ditu.
“Beldurrak” eta buru osasunaren inguruko “uste okerrak” gainditzeko beharra nabarmenduko du Pazosek Kultur Etxean, eta horretarako buru gaixotasuna duten pertsonei buruzko bideoa proiektatuko dute. Bideoak, buruko osasun arazoak dituzten hainbat pertsonen eguneroko bizitzaren berri emango du “gainontzekook bezala, gizartean integratuta eta senide zein lagunez inguratuta dauden pertsonena”, erantsi du Agifes-eko gizarte langileak. 
