Ia 5.000 soldaduk desfilatu dute Alarde tradizionaleko 21 konpainietan. Xalba Etxebestek komandante bezala jardun du lehen aldiz.
Ia 5.000 kidek desfilatu dute aurten Hondarribiko alarde tradizionalarekin
Azken urteetako eguraldi atseginena lagun, Hondarribiak jaietako egun handia ospatu zuen atzo. Goizeko bostetarako asko ziren Alborada entzutera arrimatu ziren hondarribiarrak. Dianarako askoz gehiago batu zitzaizkien, eta hortik aurrera kalera atera zen jende jarioa etengabea zen. Herri osoa eta ehundaka bisitari elkartu ziren 1638ko setioaren amaieraz geroztik burutzen den desfileaz goztzeko.
Alarde tradizionalean ia 5.000 soldaduk hartu zuten parte, 21 konpainiatan banatuta —artxeruena aurretik, eta atzetik beste hogei talde bakoitza bere kantinerarekin—. Berrikuntzen artean, komandante berria izan duela desfileak, Xalba Etxebeste. Patxi Goikoetxea seigarrenez aritu zen burgomaestre bezala, eta bere mandatuko Alarde onena bizitu zuela aitortu zuen.
Beste berrikuntza bat Alardeari harrera egin dion ordezkaritza politikoa izan da. Txomin Sagarzazuk lehen Alardea izan du alkate denetik, eta udaleko bigarren indarrak, Abotsanitzek, bi desfileei egin baitzien harrera parrokiaren kanpoaldean. Alarde tradizionalari, hortaz, gainontzeko hautetsien ondoan egin zioten harrera Abotsanitzeko hiru ordezkariek. EH Bilduren bi zinegotziek, aldiz, Jaizkibel konpainiaren desfilea jarraitu zuten udaletxeko arkupeetatik, koalizioko beste kide batzurekin, eta Emakundeko eta Arartekoaren ordezkaritzarekin batera.
Jaizkibel konpainia parekideak orain arteko desfile lasaiena egin zuen, baina oraindik plastiko beltzen artean igo behar izan zuen Kale Nagusia. Hori bai, konpainiako kideek aurrerapausuak onartu zituzten eta pozik zeuden arratsaldeko ibilbidea bukatuta. Aurten 453 gizon eta emakumek desfilatu dute konpainia parekidearekin.
Gaur, atsedenik ez
Baina Alardearekin ez dira bukatzen Hondarribiko Jaiak, ezta gutxiago ere. Askok atseden hartzeko eguna dute gaurkoa, baina haur eta gaztetxoek ez dute horretarako inolako asmorik edukiko. Gaurko egitarauak hauen neurrira prestatutakoa dirudi. Gozatu dezatela, bada.
Hilaren 9ko egitaraua
- 09:00etan: Diana, Goizut Dultzaineroekin.
- 11:00etan: San Pedro kalean, VII. Moto Lasterketa haur txikientzat (4 urte bitarte). Motoak (taka-taka antzekoak) parte hartzaileek ekarriko dituzte.
- 11:00etatik 13:30era: Zezen Plaza aurreko Harresietan, Haur Parke Erraldoia (euria eginez gero, Jostaldi pilotalekuan).
- 12:00etan: San Pedro kalean, VII. Gazte Gymkana. 8 eta 14 urte bitarteko gazteek har dezakete parte.
- 12:30ean: Sokamuturra Kale Nagusian (16 urtetik gorakoentzat). Goizut dultzaineroen emanaldia.
- 16:30ean: Gipuzkoa Plazan, Puzzleak bikoteka. Mailak:
a) 3 – 5 urte bitartekoak, 50 aleko puzzlea.
b) 6 – 8 urte bitartekoak, 100 aleko puzzlea.
c) 9 – 11 urte bitartekoak, 200 aleko puzzlea.
d)12 – 16 urte bitartekoak, 300 aleko puzzlea.
- 17:00etan: Zezen Plazatik abiatuta, Hirigune Historikotik pasa eta Porturaino iritsiko dira Erraldoiak eta Buruhandiak.
- 17:00etatik 20:00etara: Zezen Plaza aurreko Harresietan, Haur Parke Erraldoia (euria eginez gero, Jostaldi pilotalekuan).
- 20:00etan: Arma Plazan, Kemen Dantza Taldearen saioa.
- 21:00etan: San Pedro kalean, Zezen Suzkoen Entzierroa.
- 21:00etan: Bentan, Marmoka rock taldearen emanaldia.
- 22:30ean: Fonotareco show, umorezko ikuskizuna, Arma Plazan.
- 23:00etan: Bentan, Gatillazo taldearen kontzertua.
Egitarau osoa
