Ohiko ikastaroez gain, taldeenetan jarri dute arreta berezia. Lannahi programa ere abian jarriko dute, langabeek doan euskara ikas dezaten udal euskaltegian. Bidasoko Hitza.
Udal euskaltegiaren ataria
Ikasturte berrirako egitasmoa prest du Irungo Udal Euskaltegiak. Bertan izena emateko aukera bihar zabalduko du hilaren 18ra arte, eta irundarrak euskara ikastera erakartzeko
Euskarak batzen gaitu leloa erabiliko dute, “euskara hiztun berriak sortu eta euskal hiztunen artean erabilera esparruak zabaldu eta indartu nahi ditugu”. Helburu horrekin, eskaintza zabala, berritasunekin, prestatu du udal euskaltegiak. Izena euskaltegiaren egoitzan (Urdanibia plaza, 5) edo 943 50 52 73 telefono zenbakira deituz eman daiteke. Euskaltegiaren
posta elektronikora ere idatz daiteke.
Matrikulazio kanpainaren berri atzo eman zuten Josune Gomez udaleko Euskara ordezkariak eta Jaione Campo udal euskaltegiko zuzendariak. Nabarmen zuten iazko prezio berberei eutsiko dietela, eta ikasleek zenbat euskara eskola ordu gehiago hartu, merkeagoa izango dela matrikulazioaren prezioa %35era arteko beherapena izateraino: “Hizkuntza bat ahalik eta azkarren ikasteko, ahalik eta ordu gehien eskaini behar zaizkio ikasketa prozesuari”. Beka sistema prest du horretarako udalak (iazko ikasketa beka baliatzeko eskaera urriaren 8ra arte egin daiteke)
Eskaintzan, ohiko ikastaroez gain, HABE azterketa ofizialak prestatzeko taldeen eskaintza, guraso taldeena, IVAPeko taldeena, mintza taldeena, edo beste herrialde edo erkidegoetatik datozenentzako AISA ikastaroena nabarmendu zituzten.
Lannahi
Euskaltegiaren eskaintzaren barruan, euskara ikasi nahi baina langabezian daudenei arreta jarri diete, Lannahi programaren bitartez. Langabeek euskara doan ikas dezakete horren bitartez. Egitasmo hori PSE-EEk eta EAJk agintaldirako sinatutako akordioaren barruan dagoela esan zuen Gomez zinegotziak, “udalak bat egin nahi du erakundeak lana bilatzeko formazioaren inguruan egiten ari diren ahaleginarekin”.
Lannahik bost txanda izango ditu, hiru ikasturtean eta bi udan. Ikasturtekoetan, goizeko txandak lau ordukoak izango dira eta arratsaldekoak hirukoak. Alta, bertan izateko mailaketa proba egin beharko dute interesdunek izena ematen dutenean.
Hainbat bide daude horretarako.
Atzoko agerraldian, iaz Lannahi baliatu zuen Borja Gamarrak bere testigantza eman zuen. Balorazio positiboa egin zuen, esanaz hilabete gutxiren buruan bere euskara maila oso nabarmen hobetu zuela. Langabeak egitasmoan parte hartzera animatu zituen.
