Hasteko, bost udaltzaineko talde bat prestatu dute zerbitzua emateko. Udan, udaberrian eta udazkenean emango dute zerbitzua batez ere.

Lourdes Larraza udal ordezkaria, udaltzainekin, gaur zerbitzua aurkezten
Irungo Udaltzaingoa, oinezkoen eremuak nahiz bidegorriak hobeto zaintzeko, bizikletarekin ere egongo da aurrerantzean Irungo kaleetan. Azken egunetan probatzen aritu dira zerbitzua, eta horrekin aurrera egitea erabaki dute. Hasteko, bost udaltzaineko taldeak hartuko du horren ardura, baina Lourdes Larraza Udaltzaingoaren ordezkariak baieztatu duenez, taldea handitzeko aukera badago.
Goizez eta arratsaldez izango da abian bizikleta bidezko zerbitzua. Oinezko patruilek dituzten zeregin berbera izango dute, baina mugikortasun aldetik edozein tokira arinago iristeko aukera izango dute. Hala, trafikoa eta bide segurtasuna, herritarren segurtasuna eta delituen prebentzioa, nahiz udal ordenantzak betetzen direla ziurtatzea izango dira bizikleta bidezko hiriko polizien zereginak.
Udaberrian, udan eta udazkenean bereziki gauzatuko da zerbitzua. Gaur egin dute zerbitzuaren aurkezpen ofiziala Larrazak eta Juanjo Sayar udaltzainen buruak.