Urkulluk 'Euskal kasuan izandako bizitzeko eskubidearen aurkako urraketen argazkiak, herriz herri (1960-2010)' proiektua aurkeztuko die 128 alkateri. Agerraldian hiru alderditako ordezkariak izango dira: EH Bildu, PSE-EE eta EAJ.
Julen Mendoza Errenteriako alkatea eta Jose Antonio Santano Irungoa
Iñigo Urkullu lehendakariak bilerara deitu ditu gaur EAEko 128 udaletako alkate
Gogora Memoriaren, Bizikidetzaren eta Giza Eskubideen Institutuan (11:45). Jonan Fernandez Bakegintza eta Bizikidetzarako idazkari nagusiak ere parte hartuko du. Bilera itxia izango da, baina bileraren zati bat komunikabideei irekita egongo da, eta hiru alderdi nagusietako ordezkariek parte hartuko dute. EH Bilduko ordezkaria Julen Mendoza Errenteriako alkatea izango da, eta PSE-EEkoa Jose Antonio Santano Irungo alkatea. Azkenik, EAJko ordezkaria Juan Maria Aburto Bilboko alkatea izango da.
Deialdi hori
Euskal kasuan izandako bizitzeko eskubidearen aurkako urraketen argazkiak, herriz herri (1960-2010) proiektua aurkezteko egin du Urkulluk, Proposamenean biltzen denez, 128 liburuxka banatuko dituzte herri bakoitzak jakin dezan indarkeriak eragindako zein biktima izan dituzten, eta bestetik, azaroaren 10ean, Memoriaren Egunean, ekitaldiak antolatzea biktima guztiak batera gogoratzeko.
Bileraren bezperan alderdiek euren iritzia eman dute. Mendozak eta Luis Intxauspe Hernanikoak EH Bilduk daraman jarreraren berri eman zuten atzo. Urkulluk deitutako bilera «orri zuri bat izatea» nahi du koalizio abertzaleak. «Bakegintzaren eta elkarbizitzaren alorrean guztion artean erakundeen arteko elkarlanaren bide orria idazteko aukera eskainiko duena».
«Aurretiazko lanketa» sumatu du faltan EH Bilduk, baina «begi onez» ikusten du «erakundeen arteko elkarlana eta adostasuna» lortzeko edozein egitasmo. Gaur aurkeztuko zaien proiektua, horregatik, «lehen pausotzat» jotzen du EH Bilduk.
EAJk Itsaso Atutxa BBBko buruaren bidez adierazi du gaurko bilera ez dela «adostasunak» lortzeko. Gehiago dela alkateei «dokumentazioa helarazi» eta «lanerako tresnak» emateko, «udal bakoitzak erabaki dezan ondoren». PSE eta PP, horregatik, euren kritiketan «erratuta» daudela esan du Atutxak.
Izan ere, bilerako izango direnen artean, PSE mintzatu da uzkurren. Sozialistek euren txostena eramango dute:
Biktimen memoria eta biktima eragileen deslegitimazioa. Hori da eskatu dutena: «ETA deslegitimatzea».
