Igandean hasiko dira Hondarribiko Jaiak, ofizialki astelehenean, baina asko bihartik murgilduko dira jai giroan. 99 ekitaldi bildu ditu Guadalupeko Amaren omenezko jaien egitarauak.
Haurrek abiatuko dute festa, igande goizean
Etzi, igandez, hasiko dira Hondarribiko Jaiak. Egitarauak hala dio behintzat, nahiz eta hasiera ofiziala biharamunean egiten den, hilaren 7an. Aurten, baina, kuadrillen afariko eguna igandea izanik, biharko ere jai giroa ziurtatuta dago, besteak beste, Guadalupeko igoerarekin eta Grises eta Zea Mays taldeen kontzertuekin. Horregatik, bati baino gehiagori luzeegi egingo zaizkio aurtengo jaiak, hilaren 11 bitarte atsedenerako une askorik ez baita izango, eta handik bi egunera Kontxako azken jardunaldia jokatuko delako.
Orotara, 99 ekitaldi biltzen ditu Hondarribiko jaietarako eta aurreko nahiz ondorengo asteburuetarako udalak eta herriko elkarteek prestatu dituzten egitarau ofizialak, iazkoak baino hamazazpi ekitaldi gehiago. Dirutan, 274.982 euro. Denetarik eta denentzako, hori izan dute helburu Kultura arloko arduradun eta teknikariek, Kalixa Silanes zinegotzi berriak jakinarazi duenez: “Haur, gazte eta helduentzat egindako programa bat osatzen saiatu gara. 22 ekitaldi haurrentzat dira, beste bederatzi gazteentzat, 49 publiko osoarentzat eta hemezortzi espezializatuak dei ditzakegunak. 30 bat elkartek antolatu eta laguntzen dute jarduerekin eta haiek eskertu beharrean gaude bere lan handiagatik”.
Egun handi asko
Hondarribiko jaietako egitaraua oso finkatuta dago, berritasun gutxi izaten ditu urtetik urtera, baina funtzionatzen du. Hilaren 6an hasten dira festak, haurren txupinazoarekin eta kuadrillen afariarekin. Zazpian berriro hasten dira, txupin ofiziala tarteko eta ekitaldi irmoz beteriko egitarauarekin: Urrezko Intsignia jartzea,
Te Deum eta
Salbea, udal ordezkarien aurreskua…
Baina Hondarribiko jaietako egun handia zortzia da, Alardearen eguna, koloretsuena, zaratatsuena, eta esperatuena. 1638. urtean Luis XIII.a Frantziakoaren gudarosteak hiribildua 69 egunez setiatu zuen, eta hiria askatu izana eskertzeko, Guadalupeko Amari agindu zioten urtero prozesioa egingo zutela. Hala, 1639. urtetik ospatzen da Hondarribiko Alardea. Aurten ere, lau desfile ikusteko aukera izango da —bina goizez eta arratsaldez—, Jaizkibel konpainia parekideak ezingo baitu emakumeak kantinera bezala soilik onartzen dituen Alardean parte hartu.
Alarde egunaren ondoren, irailaren bederatziak atseden hartzeko balio izaten du, eta hori haurrek eta gaztetxoek aprobetxatzen dute, jaiak eurenak ere direla aldarrikatzeko. Eta bukatzeko, beste bi egun handi, Arrantzale Eguna, hilaren hamarrean, eta Baserritarrena, hamaikan.
Alde Zaharra indartua
Iazko graffiti lehiaketa
Alardea albo batera utzita, Hondarribiko jaietako ekitaldi jendetsuenak kontzertuak izaten dira, behintzat hilaren 6, 8 eta 10ekoak. Egun horietan zaila izaten da Bentako aterpean arnasa hartzea, baina txosnek eramangarria egiten dute asuntoa. Benta bezala, ondoko kaleetako tabernak gainezka egoten dira egun horietan, bereziki bazkaldu aurretik eta afalostetik aurrera.
Hori horrela izanik, Alde Zaharra indartzen ari da pixkanaka, eta aurten bide horretan urrats txiki bat eman du udalak, Kasino Zaharreko lorategietan zenbait ekitaldi programatuz. Leku ederra da, eta azken bi urteetan argi geratu denez, kultura ekitaldiak burutzeko aproposa. Besteak beste, graffiti lehiaketak harresiaren kanpoaldetik bertara sartu ditu udalak.
