Dies Oiassonis, ikusgarria

Dies Oiassonis jaialdiak espero zituen helburuak gainditu ditu. Oiasso Museoko kideek nabarmendu dute aurtengo proposamen berriek arrakasta izan dutela. Bidasoko Hitza.

Urko Etxebeste

Irun

2015/07/20

Errekreazio erromatarra, igandean

Atzo bukatu zen 2015eko Dies Oiassonis, seigarren erromatarren jaialdia Oiasso Museoak eta udalak antolatua. Aurten, azokak, moda desfileak, gastronomia eta Medea antzerkia ziren berritasunak, eta denetan arrakasta izan da museoko eta udaleko kideen arabera. Medea antzezlana egin zuten igande eguerdian (ostiral gaueko funtzioa bertan behera utzi zuten, euriagatik). Bertan 450 pertsona bildu ziren, asko. Dies Oiassonisen izarretakoa izan zen. Gastronomiari lotutako jarduerak ere jendetsuak izan ziren, Irun Dastaturen barruan egindakoak. Zentroko eta Alde Zaharreko ostalaritza guneek erromatarren garaiko pintxoak egin, eta erruz saldu zituzten. Bestalde, gourmet afariei dagokienez, ia denak saldu egin ziren. Ostiral arratsaldean, jaialdiaren lehen urratsetan, erromatarren garaiko jantzien diseinuekin moda desfilea egin zen Oiasson, gisa horretako janzkeraren gainean egindako moda lehiaketaren azken ekitaldi modura, Moda Museoan izenarekin. Hura ere jendetsua izan zen. Madrilgo Sara De Pedro izan da lehiaketaren irabazlea. Eta jaialdia bitartean abian izan den azokak milaka irundar eta kanpotar bildu ditu. Proko Gomez irundarrak bere Facebook atarian larunbateko argazkiak bildu ditu. ‘Navigium Isidis’ Klasikoa da jaialdian, baina ekitaldirik arrakastatsuena ere bada. Larunbatean Navigium Isidis prozesioa egin zute hiritik 200 bat boluntariok, eta horrek milaka hiritarren ikus-mina piztu zuen, eguraldi onaren laguntzarekin erruz bildu zirelako ikusleak bidean zehar. Ikusgarria izan zen. Errekreazio historikoek ere izan dute arrakasta. Hala, hori guztia kontuan hartuta, udaleko nahiz Oiassoko arduradunak pozik daude jaialdiaren seigarren ekitaldiak eman duenarekin. Oiasson pozik daude aurtengo egitaraurako landu dituzte proposamen berriek erantzun ona izan dutelako, “sentsazio positiboak jaso ditugu”. Udalean ere ados daude horrekin, eta gaineratu dute hirian izan diren turisten kopuruak gora egin duela nabarmen Dies Oiassonisengatik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.