Izan, badira meigak. Urtero azaltzen dira San Miguel Ligako Galiziako lehen bi estropadetan. Aurten, meigak eta Jaizkibeleko sorginak ados jarri dira eta hiru traineruren alde egin dute nabarmen, Tiran, Cabo, eta batez ere, Hondarribiaren alde.
Gazteak bikain erantzuten ari dira
Izan, badira meigak. Urtero azaltzen dira San Miguel Ligako Galiziako lehen bi estropadetan, eta beti izaten da traineruren bat asteburu hori egutegitik ezabatu nahi izaten duena. Bada, aurten, badirudi meigak eta Jaizkibeleko sorginak ados jarri direla eta hiru traineruren alde egin dute nabarmen, Tiran, Cabo, eta batez ere, Hondarribiaren alde.
Liga hasiera besterik ez da, baina Ama Guadalupekoak zaleak amesten jarri ditu. Hiru estropada baino ez dira pasatu, baina azken urteotan Hondarribiak huts egin izan du lehen hiru proba horietan, eta gero ez. Aurten hori egin ez ezik, aurkari guztiak erortzen ikusi dituzte berdeek. Irailaren 20a urruti geratzen da, baina Ama Guadalupekoak tarte polita zabaldu du atzekoekiko eta dagoeneko San Miguel Liga irabazteko hautagaietako bi erori dira, Orio eta Kaiku.
Larunbatean III. Nauta Sanxenxo Bandera irabazi zuen Hondarribiak, Caboren aurretik (
ikusi sailkapena). Orio, Urdaibai eta Kaiku, Malagan 2., 3. eta 4. geratu ziren ontziak eta pronostikoen arabera liga irabazteko beste hiru faboritoak direnak, seigarren, bederatzigarren eta zortzigarren postuan helmugaratu ziren. Txanda berean lehiatuta, Hondarribiak zazpi ontziko tartea atera zion Urdaibairi.
Moañan ere lan txukuna egin zuten berdeek
Eta igandean, bigarren tokian bukatu zuten bikingoek XXXIII Concello de Moaña Bandera, V. Fandicosta Saria (
ikusi sailkapena), euren txanda aise irabazita. Bi bandera eta bigarren postu bat lehen hiru estropadetan. Itzela ligaren hasiera.
Galiziarrak ondo etxean
Hondarribiaren ondoren, bi talde galiziarrak ibili dira hoberen asteburuan. Tiran hor dago beti, zarata handirik atera gabe, ezkutuan bezala, bere aukeraren zain. Asteburuan, besteen hutsa aprobetxatu dute sailkapenean gora egiteko eta ezustean ohorezko txandan sartzea lortu dute, Sanxenxon nahiz etxean laugarren izan eta gero. Postu hori bera du Tiranek San Migel Ligako sailkapenean, eta larunbatean Pasaian liderraren txanda berean bogatuko du.
Cabo ondo dabil, aurten ere bere maila emanez. Gehienek lau euskal oilarren atzetik ibili beharko zela uste zuten arren, hirugarren jarri da sailkapenean eta 4 eta 6 puntuko tartea ireki du hurrenez hurren Orio eta Kaikurekiko. Ama Guadalupekoa urruti dute, baina Boirokoak edozertarako gai dira.
Oarsoaldeko bi ordezkariak, bigarren tandan bogatuko dute hurrengo asteburuan. San Pedro, igandeko erakustaldiaren ondoren sailkapeneko zortzigarren postuan iritsiko da etxeko estropadara. Sanjuandarrak zazpigarren dira, Galizian asteburu irregularra pasata.
Hurrengo biak Gipuzkoan
Datorren asteburuan Gipuzkoan lehiatuko dira San Miguel Ligako traineruak. Larunbatean III. La Caixa Bandera izango dute jokoan San Pedron, eta igandean, IV. Euskolabel Bandera Donostian, Koxtapek antolatuta.
Galiziako meigarik gabe, ezusteko gutxiagoko estropadak izan ohi dira, baina 2015eko liga hasiera ero honetan ezin da ezer aurreratu. Gainera, badian kaleen arteko alde handia izaten da eta eguraldiak estropada baldintzatu dezake. Hori bai, hondarribiarrek euren erregulartasunari eutsiko baliote, bat baino gehiago urduritzen hasiko da, dagoeneko hasiak ezpadira.
