12:00etan hartuko du Santanok aginte makila etzi
Udalbatza berria osatzeko eta alkatea izendatzeko udalbatzar berezia egingo dute etzi eguerdian. Ez da ezustekorik espero, eta Jose Antonio Santanok hartuko du alkate kargua 2019ra arte.
Maiatzaren 24ko udal hauteskundeetan jasotako emaitzen arabera udalbatza osatuko dute etzi Irunen. Horren arabera, eta ezusteko handirik ez badago, Jose Antonio Santano PSE-EEren alkategaiari emango diote beste behin hiriaren aginte makila, litekeena delako bere alderdiko zinegotziek haren alde egitea, eta gainontzekoek bere hautagaiak soilik babestea. Hortaz, 2003tik alkate denak, 2019ra arte luzatuko du agintaldia. 12:00etan hasiko da etzi udalbatza osatzeko eta alkatea izendatzeko udalbatzarra.
Alkatea izendatzeko bozketa egin aurretik ordea, izango dituzte Irungo 25 zinegotziek beste zeregin batzuk, hala nola Adin Mahaia osatzea, zinegotzien kredentzialen konfirmazioa, kargu hartzearen zin egitea, edo udalbatza beraren osaketa jarduera (udalbatza osatzeko nahikoa da zinegotzien gehiengo sinplea egotea udalbatzan, Irunen kasuan 25etik 13). Horiek egin ondoren, emango diote Santanori agintari makila: alkatea izendatzeko bozketa sekretua da.
Horrela, gisa honetara egongo dira banatuta udal areto nagusiko eserlekuak datozen lau urteetan: PSE-EEko zinegotziek 10 besaulki hartuko dituzte; EAJko nahiz Si Se Puede Irunekoek bosna; EH Bildukoek hiru, eta PPkoek, bi.
