Bidasoa Bizirik erakundeak iazko balorazioa egin du. Zentzu askotan Bidasoaren aldagai ekonomikoak gora joan direla adierazi du, eta horren funtsa kolaborazioa eta berrikuntza direla adierazi du erakundeak. Bidasoko Hitza.
![Krea Bidasoaren barruko formazio saio bat](http://bidasoa.hitza.eus/site/files/2015/06/krea.bidasoa-300x187.jpg)
Krea Bidasoaren barruko formazio saio bat
2014an egindakoen berri eman du Bidasoa Bizirik Behe Bidasoko Garapen Agentziak. Zifretaz harago, iazko jarduerarik garrantzitsuenak kolaborazioan eta berrikuntzan oinarritu direla esan du erakundeak, enplegua, enpresen jardunak eta ekintzailetza sustatuz eta babestuz. Eta datu orokorrak honakoak dira: El Espazio guneak 16.000 lagun jaso ditu, Bidasoa Bizirik-en kolaborazioari esker 167 enpresa sortu dira, 380 enpresak nazioartera zabaldu dute euren jarduna, eta turismo alorrean, 121.000 pertsona izan dira Irungo nahiz Hondarribiko turismo bulegoetan.
Lan munduan, erakundearen arabera, enpresa sarearekin lankidetza, eta estrategia nahiz ekintza berritzaileak bultzatu dituzte 2014an, baita formazioari garrantzia eman ere. Esaterako, enpleguaren bi aste egin dituzte, 232 lan eskaintza sortuz.
Enpresen alorrean, berrikuntza eta lankidetzaren alde lan egin du Bidasoa Bizirik-ek. Hala, Ipar Euskal Herriko sare enpresarialarekin indarrak batu, eta Bidasoko enpresei hara ateak zabaltzeko saiakerak egin dituzte, Innov-Mugabe plataformaren barruan: 6.000 enpresako sarea dago bertan.
Ekintzailetzan ere indarra jarri du 2014an erakundeak. Finantzazio alternatiborako ekimenak, aholkularitzarakoak nahiz babeserakoak indarrean jarri dituzte, bestek beste.
Eta turismoaren indarraz jabetuta, eragile publiko eta pribatuen arteko elkarlanak emaitzak eman dituela esan du Bidasoa Bizirik-ek, zehaztuz, orotara 121.000 bisitari izan direla Irungo nahiz Hondarribiko turismo bulegoetan, eta gainera, Interneten bi herrien turismo eskaintza indartu egin dela. Promozio turistikorako zazpi egitasmotan parte hartu du erakundeak.
Datu sozioekonomikoak
Behe Bidasoko datu sozioekonomikoen lanketa ere egiten du Bidasoa Bizirik-ek. Iaz bildutako datuen arabera, populazioan joera positiboa mantendu egin da, Irun 61.508 biztanlera eta Hondarribia 17.077ra iritsiz. Langabeziak ere, modu apalean, behera egin du 2013arekin alderatuz.
Lan kontratu moten gaineko datua ere eman du: %28,8 hazi dira kontratu mugagabeak 2013tik. Egirura enpresarialean, aldiz, beheraldia izan da, %1,1 jaitsi delako. Hala ere, Bidasoko sare enpresarialak 24.944 pertsonari ematen diola lan adierazi du.