Hiriko parkeetan, kultura, aisia eta kirol egitasmoak uztartzeko egitasmoa da Girabira. Sargia parkean egingo dute lehena.
![Lotzen Add taldeko kideak, parkourra egiten Irunen](http://bidasoa.hitza.eus/site/files/2015/06/parkour.irun_-300x187.jpg)
Lotzen Add taldeko kideak, parkourra egiten Irunen
Hiriko parkeetan aisia tarteak elkarlanean uztartzea musika, tailer, bazkari eta bestelako jardueren bidez. Hori da Girabira egitasmoaren ardatza, eta lehenengoz larunbat honetan jarriko dute praktikan: Sargia parkean egingo dute lehen Girabira. 16:00etan hasiko dira jarduerak.
Irungo Udaleko Kultura arloak, eta Txikis del Bidasoa nahiz Ezmugak elkarteen ekimenez aurrera aterako da Girabira egitasmoa. Esandakoa: lehen egunean, larunbatean, parkourra nagusi. Eta hiri kirol modalitate hori egiteko tailerra egingo dute lehenik Lotzen Add Elkartearen eskutik. 12 urte dituztenentzako dago prest jarduera, eta 15:30ean egon beharko dute Sargian parte hartzaileek: aldez aurretik eman behar da izena
elkartearen posta elektronikora idatzita.
Horren ondoren, parkourraren gaineko informazioa biltzeko jarduera, parkour entrenamendua (17:30-18:00) eta kirolaren gaineko hitzaldiak egingo dituzte.
Musika ere egongo da. 17:30ean Artie Escolar DJak arratsaldea girotuko du, eta 18:30ean El Octavo Arbol taldeak kontzertua emango du, ondoren Sangre de Mono taldeari txanda emateko.
Larunbatekoa Girabiraren lehen ekitaldia izango da. Udalaren aurrekontu parte hartzaileen egitasmoan, gazteen atalean botorik gehien lortu zituen egitasmoen artean egon zen Girabiraren ideia garatzeko aukera eman zuena. Larunbatekoaz gain, hurrengoak honakoak dira ondorengo zitak:
- Uztailaren 11n, Soroxarta parkean.
- Abuztuaren 21ean Alai Txoko parkean.
- Irailaren 19an Sargian berriz ere.