Herriko ikasleak bertsolari izango dira gaur Hondartzan

Gipuzkoako Bertsozale Elkarteak, Euskara Zerbitzuak, eta herriko ikastetxeek antolatzen dute. Lehen Hezkuntzako 4. eta 5. Mailako ikasleak ariko dira bertsotan, 17:00etan 4. Mailakoak eta 18:15ean, 5.ekoak.

Asier Perez-Karkamo

Hondarribia

2015/06/03

Gu ere bertsolari programako iazko saioa (arg: Floren Portu)

Bertso saio handia dago antolatua Hondartza kiroldegian gaurko. Gipuzkoako Bertsozale Elkarteak, Hondarribiko Udaleko Euskara Zerbitzuak, eta Gurutzeko Alabak, Talaia eta Ama Guadalupekoa ikastetxeek antolatzen dute, eta bertsolariak, herriko Lehen Hezkuntzako 4. eta 5. Mailako ikasleak izango dira. Gaur arratsaldekoa, Gu ere bertsolari programako ekitaldia izango da, Ahozkotasuna eta bertsolaritza proiektuaren barruan kokatzen dena. 17:00etan 4. Mailakoen saioa izango da eta 18:15ean, 5. mailakoena. Ikasleak taldeka ariko dira, bost minutuko saioetan, Gipuzkoako Bertsozale Elkarteko adituaren eta haien irakaslearen laguntzarekin. Euskara Zerbitzuak azaldu duenez, bertsolaritzan murgiltzeaz gain, beste hainbat balore jasotzeko aukera izango dute ikasleek Gu ere bertsolari programarekin: “Aukera paregabea izan dute ahozko komunikazioa eta bertsolaritzaren oinarriak lantzeko. Bertsolaritzaren hainbat baliabide erabiliz lortu dute, besteak beste, ahozko adierazpena hobetzea, estrategia eraginkorrak bultzatzea, hizkuntza aldetiko sormena bultzatzea, jendaurrean egoteko eta hitz egiteko oztopoak gainditzea. Beraz, bertsolaritza ikastetxeetako Hezkuntza Proiektuan jasotako helburuak bermatzeko tresna ezin hobea da”. Ahozkotasuna eta bertsolaritza proiektuak helburu bikoitza du. Batetik, bertsolaritza sendotzeko balio du, eskola kurrikulumean bertsolaritza ezartzen baitu, eta bestetik, zaletasuna pizteko balio du, “bertsogintzari eskolako jardunean funtzionalitatea emanik, zaletuen beharrak eta gogoak elikatuz”. Egun Gipuzkoa osoko 52 herri eta 132 ikastetxetan 10.000 gazte inguru ari dira Ahozkotasuna eta Bertsolaritza proiektua lantzen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.