UCAM Murcia taldearen kontra atzo 1-0 galdu ondoren, Bigarren Mailara igotzeko kanporaketei agur esan die Real Union taldeak.

Atzoko partidaren une bat
UCAM Murcia taldeak Bigarren Mailara igotzeko erronkan bidea moztu zion Real Unioni atzo. Stadium Galeko 0-0ekoaren ondoren, irabazi beharra zuten irundarrek hurrengo kanporaketara iristeko. Baina galdu egin zuen, luzapenean, 1-0. Javi Gomezek Murtziako taldearen gola sartu zuen, 104. minutuan, eta La Condomina zelaian zeuden 5.000 zaleak pozez txoratzen, eta irundarrak triste.
Hortaz, Bigarren B Mailan jarraituko du Real Unionek 2015/2016 sasoian. Baina ez du nolanahiko sasoia egin: Ligan lehenen artean izan da igoerako kanporaketak jokatzeko aukera izateraino, Federazio Kopa irabazi du, mendeurrena ospatzen ari da, eta are garrantzizkoagoa izan daitekeena: hiriak berriz ere bat egin du taldearekin.
Aitor Zulaika entrenatzaileak lan handia egin du taldea osatzen, konfiantza ematen, lehiarako oinarriak ematen. Hurrengo sasoian jarraipena izan behar du horrek.