Familian sare sozialek duten eragina aztertuko dute Itsas Etxean asteartean
Nerabeek sare sozialekin duten harremana eta familienganako eragina aztertuko dute hainbat adituk. Gazteria udal departamentuak antolatu du, ikastetxeekin burutzen ari den lanaren barruan.
Sare sozialek familiengan duten eragina aztertuko dute bihar, asteartea, Hondarribiko Itsas Etxean. Udaleko Gazteria departamentuak antolatu du jardunaldia eta 18:00etan hasiko da. Udalak azaldu duenez, “sare sozialek seme-alaben bizitzan duten eragina eta prebentzio estrategiak” landuko dituzte.
Ikasturtean zehar, lankidetzan aritu dira udala eta ikastetxeak, “bizimodu osasuntsuak sustatzeko eta ume nerabeak babesteko eragileak lantzen”, eta hainbat programa abiatu dituzte horretarako. Besteak beste, gaitasun sozialak, heziketa sexu-afektiboa eta drogen gaiak landu dituzte ikasleekin.
Oraingoan sare sozialen eragina aztertuko dute eta gurasoek parte hartzeko aukera izango dute. Jardunaldian, Carolina Liaño Osakidetzako Haur eta Gazteen Sikiatriako ordezkaria, Montserrat Peris EHUko Psikologia Fakultateko irakaslea eta Nerea Zuazua Prebentzio Komunitarioa Udal Zerbitzuko ordezkaria izango dira, eta Luis Miguel Moreno Osakidetzako kidea, moderatzaile bezala.
Udala eta ikastetxeak lankidetzan ari dira
