Hondarribiko EH Bilduk hauteskunde kanpainako ekitaldi nagusia burutu zuen atzo Portuan. Lore Erriondo alkategaiak lehen urrats bezala udal inbentario bat egitea proposatu zuen.
Erriondo, atzoko mitinean, zerrendako kideak atzean dituela
Hondarribiko EH Bilduk hauteskunde kanpainako ekitaldi nagusia burutu zuen atzo Portuan. Dozenaka zale gerturatu ziren San Pedro kalean 19:00etatik aurrera eginiko mitinera. Udal hauteskundeetara aurkeztu duten zerrendako kideak atzean zituztela, Lore Erriondo alkategaia eta Xabier Olano ahaldun nagusirako hautagaia mintzatu ziren.
Txalapartarekin eginiko deiaren ondoren, Miren Legorburuk aurkeztu zuen ekitaldia. Zerrendako kideei oholtzara igotzeko eskatu zien, eta jarraian Erriondori zuzendu zitzaion, gerturatzeko eskatuz. “Indarra eta ilusioa” duen emakumea dela nabarmendu zuen Legorburuk, “talde guztiak duen bezala”.
Egungo udal politika iraultzeko asmoa azaldu zuen EH Bilduren hautagaiak atzo, eta lehen urratsa udalaren ondasunen inbentario bat egitea izango dela adierazi zuen, “hondarribiarrek jakin dezaten zer den eurena”. Bere hitzetan, egungo udalaren ezaugarria “pribatizazioa” da, eta hori aldatzeko beharra azaldu zuen.
Hitzaldiaren ardatz hiru gai izan zituen, gizarte zerbitzuak, euskara eta emakumea, baina ez zituen koalizioaren hauteskunde
programa osatzen duten beste atalak alboratu, hala nola, ingurumena, edo mugikortasuna, besteren artean. Ingurumenari, gaienera, zati garrantzitsua eskaini zion. Iritzi zuenez, “ez dugu behar bezala zaindu”, eta Txingudi, “hegaztien babeserako Gipuzkoako gune berezi bakarra” dela gogorarazi zuen EH Bilduren hautagaiak.
Herriko taldeetara hurbiltzeko konpromisoa azaldu zuen Erriondok atzoko mitinean, arlo guztietako taldeetara: “Herritarren zerbitzura gaude, herritarrengana jo behar dugu, ez beraiek guregana, bizitzeko baldintza hobeak lortzeko, herri hobea izateko”. Hala, gizarte zerbitzuetan gehiago inbertitu behar dela gaineratu zuen, “ez da karitatea, ekitatea baizik”.
Euskara ikastea, doan
Euskarari dagokionez, Hondarribia “herri euskalduna” dela nabarmendu zuen, eta euskaraz ez dakitenei “doan ikasteko aukera eskaini behar zaiela” esan zuen. Era berean, arlo guztietan “euskara erakargarria” egin behar dela erantsi zuen Erriondok.
Maiatzaren 24aren ondotik Hondarribia “feministagoa” izango dela iragarri zuen EH Bilduren hautagaiak, eta horretarako “ahaldundu egin behar dugu emakumea”. Historian arakatu egin behar dela esan zuen, herriko emakumeek egindako lana balorean jartzeko, eta baserritarrak eta saregileak aipatu zituen bere hizketaldian.
Ospakizunetan ere, “guztiok aktiboki parte hartzeko aukera” behar dutela gehitu zuen, eta Alardearen gatazka gainditzeko elkarrizketa abiatuko dutela jakinarazi zuen: “Alardea hondarribiarrena da eta gatazka dagoenean udalaren erantzukizuna da”. Zentzu horretan, egungo udal gobernua kritikatu zuen, “gatazkaren parte” izan delako.
Bihar, Guadalupen
Bihar, ostirala, San Isidroko ospakizunak direla-eta Guadalupera igoko dira EH Bilduko kideak. Eskuorriak banatuko dituzte, musika giroarekin.