Puntalekoari iritsi zaio ordua
Aurki hasiko dira Hondarribiko Puntal auzoko futbol zelai hondatua birmoldatzen. Belar artifizialekoa egingo dute, Amutekoa edo Soroetakoa bezala. Luzeraz 38 metro ditu eta ia 30 zabaleraz; auzoetakoen artean txikiena da.
93.960 euroko inbertsioa eginda, Hondarribiko Udalak Puntaleko futbol zelaia berrituko du, egungo lurra belar artifizialarekin ordezkatuz. Esleipena eginda dago eta gutxi barru hasiko dira lanak.
Obrak hasi eta bi hilabetera Puntalean zelai berria inauguratu ahal izatea espero du Txomin Sagarzazu Kirol zinegotziak, eta kirola praktikatzeko hobekuntza handia izango dela argitu du: “Belar naturala artifizialarengatik aldatuko da eta hobekuntzak egingo dira euri-urak jasotzeko, putzurik sor ez dadin eta kirolaren praktika errazteko. Orain arte futbol-zelaia belar naturalekoa zen, baina komenigarria iruditu zaigu artifizialekoa bihurtzea, mantenu txikiagoa eskatzen duelako eta futbol-zelaia egoera onean egotea errazten duelako, horrela gehiago erabili ahal izango delako eremua”.
Dagoen lekuan egonik, etxe artean, Puntaleko futbol zelaia ez da handia, baina herriko kirol azpiegitura multzoa hobetzeko balioko duela gaineratu du Sagarzazuk: “Neurri txikiko futbol-zelaia da, 38 x 29’5 metro hain zuzen, baina Amuten, Soroetan, eta Hondartzako kirol-eremuan ditugunekin batera oso baldintza onak eskaintzen dizkiegu hondarribiarrei kirol honen praktikarako”.
Egungo egoera ez da batere ona
