Azken hiru partidetan zazpi puntu pilatu eta jaitsiera postuetatik ihes egitea lortu du Hondarribiak
Ohorezko Mailako taldeak 0-2 irabazi dio Usurbili eta sailkapenean aurretik jarri da. Datorren asteburuan Lasarte-Orian gauza bera egiten saiatuko da, Ostadarren kontra.
Hondarribiko futboleko lehen taldeak garaipen handia lortu zuen larunbatean Usurbilen (0-2), Ohorezko Mailako lehen itzuliko azken jardunaldian. Aurkari zuzen baten kontra lortu zuten garaipena hondarribiarrek, eta sailkapenean aurretik jartzeko balio izan die.
Zarautzen irabazi, Anaitasunarekin etxean berdindu, eta Usurbilen irabazi. Azken hiru partidetan lortutako emaitzei esker, hamaseigarren posturaino jauzi egin du Ohorezko Mailako Hondarribia futbol taldeak eta jaitsiera postuetatik aldendu da.
Duela lau jardunaldi Usurbil taldea 15.a zen, eta sei puntu ateratzen zizkion Hondarribiari. Azken aurreko tokian zeuden berdeak, Ostadarren atzetik eta azken tokitik puntu batera. Hiru partidatan Usurbil utzi dute atzean, eta bost puntukoa da orain azkenarekiko duten tartea. Aurretik, puntu batera dute Ostadar eta bi puntura Aloña Mendi.
Bi bolada on
Zortzigarren jardunaldira arte ez zuen lortu Hondarribiak ligako lehen garaipena. Beti Gazteren kontra irabazi eta gero, beste lau partida iraun zuen galdu gabe. Orotara, zazpi puntu pilatu zituen errenkan eta maila eusteko borrokan sartzeko balio izan zion.
Oraingoan beste zazpi puntu lortu ditu jarraian, eta jaitsierako postuetatik irten da denboraldiko bigarren bolada onari esker. Eta hurrengo asteburuan kolpea biribiltzeko aukera izango du, Lasarte-Orian, sailkapenean aurretik duen Ostadarren kontra. Irabaziz gero, postu bat gora egingo luke Hondarribiak, eta agian beste bat ere, Aloña Mendik Martutenen ez badu irabazten.
