Abenduaren 8an izango da partida Artaleku kiroldegian, 12:00etan. 2003a geroztik eskubaloiko euskal selekzioa ez da inoren aurka lehiatu; 11 urteren ondoren, Irunen eta Barakaldon ariko da Kubako selekzioaren kontra.
Ezkerretik eskuinera: Sodupe, Santano eta Ruiz de Cenzano.
Irungo Udaleko Jose Antonio Santano alkatea, Bidasoa Kirol Klubaren Jose Angel Sodupe presidentea eta Euskal Herriko eskubaloi federazioko Jose Manuel Ruiz de Cenzano presidentea bildu dira partidaren aurkezpenean, udaletxean.
Euskal Herriko eta Kubako selekzioen arteko partida abenduaren 8an astelehenarekin jokatuko dela adierazi dute, Artaleku kiroldegian, 12:00etan hasita.
Lehenik eta behin, Santanok hartu du hitza. Haren arabera, “orain dela gutxira arte ez genuen emakume talderik eskubaloian, eta hori pixkanaka aldatzen doa”. Ildo horretan, kadete eta haurren kategorietan orain neska talde bana entrenatzen ari direla Bidasoan nabarmendu du alkateak. “Irun eskubaloiarekin oso lotuta dago eta neskak horretara gehitzeko ahalegina egin behar da”, erantsi du Santanok.
Jose Angel Sodupe Bidasoa Kirol Klubaren presidenteak bere aldetik, “Irunerako gertakari berezia” dela iritzi dio.Santanoren ildo beretik mintzatu da Sodupe: “Federazioko presidentearekin bilera batean nintzela zergatik partida Irunen jokatzen ez ote zen galdetu nuen, eta haren erantzuna izan zen Irunek gizonezkoen eskubaloia zeukala soilik”. Horren aurka egin zuen Sodupek eta azkenean, partida Artalekura ekartzea lortu zuen.
Hori horrela “arrakasta izatea” espero duela adierazi du klubeko arduradunak eta beste lurraldeetatik jendea hurbiltzea aurreikusi dutela gaineratu du.
Bera Berako jokalariak nagusi
Ruiz de Cenzano federazioko presidenteak Kubako selekzioaren maila goraipatu du, batez ere, Erdialdeko Amerikako eta Karibeko jokoak Mexikon irabazi ondoren.
Euskal selekzioa bestalde, Bera Bera taldeko jokalariez osatuta dago batez ere. Hala, presidenteak azaldu duenez, “Patricia Elorza eta Eli Pinedo jokalariak Espainiako selekzioarekin zer gertatuko ote den jakiteko zain daude”. Ainhoa Hernandez jokalariaren kasua ere antzekoa dela aipatu zuen presidenteak eta Europako Txapelketarako deitzen ez badute Artalekun ariko dela gaineratu zuen.
Hori horrela, Bera Bera klubeko zazpi jokalari ariko dira Artalekun, besteak beste: Maite zugarrondo, Alba Menendez, Esther Arrojeria, Amaia Azanza, Maialen Mujika, Matxalen Ziarsolo eta Silvia Ederra. Zuazok ere hainbat ekarpen egingo ditu selekziora, hala nola: Leire Garcia, Tania Yañez, Oihane Gil, Nerea Elicegui, Yanire Etxabe eta Ainhoa Hernandez ahal izanez gero.
Zarautz taldetik Nerea Arregi eta Ane del Hoyo ariko dira selekzioarekin eta Sporting de la Riojatik, Jesica Nogales.
Entrenatzeko denbora gutxi izan arren, maila handiko partida izango dela aurreikusi dute antolatzaileek. Sarrerak eskuratzeko modu bakarra leihatilan bertan izango dela ere nabarmendu du Ruiz de Cenzanok.
