27 film laburren artean erabaki beharko du Gazte Bideo Lehiaketaren epaimahaiak
Abneduaren 9tik 12ra bitartean proiektatuko dituzte lan guztiak Amaia KZn; bi sari banatuko dira denera, bata Sail Ofizialeko Bideoak kategorian eta bestea, Bidasoko Film Labur Onena mailan. Hirugarren kategoria, hutsik geldituko da aurten.
170 ikus-entzunezko jaso ditu Gazte Bideo Lehiaketaren 18. ekitaldiak. Horien artean, 27 aukeratu ditu epaimahaiak finalerako; horietako 25 Sail Ofizialearen Bideoak kategorian lehiatuko dira eta beste bi gehiago, Bidasoko Film Labur Onena atalean. Hirugarren kategoria batean saria banatu behar zuten arren, +Cortos izeneko atalean inork ez duela ekoizpenik aurkeztu jakitera eman du Irungo Udalaren Fernando San Martin Gazteria delegatuak.
Hori horrela, sail ofizialeko irabazleak 1.500 euro eskuratuko ditu; Bidasoko Bideo Onenak aldiz, 200 euro eta Espainiako 50 zinemalditan izen ematea lortuko ditu trukean.
Proiekzioei dagokienez, abenduaren 9an Amaia KZren Hitzaldi Aretoan izango dira Bidasoko ataleko emanaldiak, 20:00etan abiatuta. Abenduaren 10ean eta 11n, sail ofizialeko film labur guztiak proiektatuko dituzte, Amaiaren auditoriumean, 20:00etan. Eta azkenik, sari banaketa hilaren 12an egingo dute, auditoriumean kasu honetan ere, 20:00etan hasita.
