Marihuana landaketa bat desegin du Ertzaintzak Anakako pabilioietan
Astelehenenean burutu zuten operazioa eta horren ondorioz, 46 urteko gizon bat atxilo eraman zuen Ertzaintzak.
Ertzaintzak kalamua landaketa bat desegin zuen astelehenean Anakako industriaguneko pabilioi batean. Zabaldutakoaren arabera, Ertzaintzak pabilioi batetik “marihuana usain handia” ateratzen zela jakin zuen, “azken egunotan jasotako informazio” bati esker. Hori dela eta, astelehenean arratseko 20:00etan “agenteak lekura abiatu ziren zegokien frogaketa egiteko”.
Argia ikusi zutenez pabilioiaren barruan atea jo zuten, Ertzaintzaren arabera beti ere, eta gerora atxilotu zuten gizonak ireki zuen atea. “245 marihuana landare” aurkitu zituztela adierazi dute ertzainek, “eta horien landaketarako material ugari: laborantza intentsiborako 16 lanpara, 11 haizagailu eta aire girotuko 4 gailu”.
Atea ireki zuen 46 urteko gizona atxilotu zuen Ertzaintzak, ustezko droga trafiko delitu bat leporatuta.
