Babes ofizialeko etxebizitza esleitu eta hasierako sarrera ordaindu arren, mailegua emateari uko egin zien bankuak 5 lagunei; orain, aurreratutako zenbatekoa berreskuratzeko arazoak dituzte enpresa eraikitzailea hartzekodunen lehiaketan dagoelako.
Hiru urteko ibilbidea bete du Bidasoko plataformak
Irunvi Irungo Etxebizitzarako Elkarte Publikoaren aurka jo zuen atzo goizean Bidasoko Stop Kaleratzeak plataformak San Juan plazan egindako agerraldian. Oinaurreko babes ofizialeko etxebizitzen harira egin zuen salaketa, baina lehenik eta behin, dolumina adierazi nahi izan zuten astelehenean Errioxan etxetik kaleratu eta ordu batzuetara bere buruaz beste egin zuen gizonarengatik.
Plataformako kideek azaldu dutenez, Oinaurren etxebizitza esleitu zieten zenbait lagunek zegokien sarrera ordaindu zuten, baina ondoren, hipoteka sinatzera joan zirenean bankuak mailegua emateari uko egin zion. Etxebizitza horiek “beste erosle batzuei saldu zizkieten” eta beraz, hasierako onuradunek etxebizitza galdu zuten.
Ez hori bakarrik. Sarrerarako aurreratutako dirua berreskuratzen saiatu arren, Nasipa enpresa eraikitzailea hartzekodunen lehiaketan sartu zela dio plataformak, eta beraz, ezin diela zenbatekoei aurre egin. Irunvik gainera ez duela “erantzukizunik hartzen” salatu dute. Bost kalteturen kasuak azaleratu dituzte denera.
Ildo horretan, batetik babes ofizialeko etxebizitzetan sartzeko “baldintzak zorrotzak” direla iritzi diote, eta bestetik, “Irunek oraindik ere etxebizitzak saltzearen alde egiten du”, alokairu soziala bezalako alternatibak kontuan hartu gabe. “Eskubideak ez zozkatzeko” eskatu du plataformak: “Irrigarria iruditiko litzaiguke osasun arreta jasotzeko eskubidea zozkatzea”.
Hiru urteko ibilbidea
Bidasoko Stop Kaleratzeak hiru urte bete ditu dagoeneko. Denbora tarte honetan datuek ez dute halere hobekuntzarik uzten agerian. Espainiako Estatistika Institutuaren (INE) datuak gogora ekarri ditu plataformak hori baieztatzeko: “18.749 etxegabetze 2014ko apirilaren 1etik ekainera 30a arte; 2013ko epealdi horretan baino %3,7 gehiago”.
Halaber, De Guindos legeak ezarritako luzapena 2015eko maiatzean indarrean egoteari utziko dionez, egoerak “okerrera” egin dezakeela iritzi diote. Hala, kaltetuek lehenbailehen harremanetan jartzea eskatu dute, “borrokatzeko denbora beharrezkoa baita”, 622 866 647 zenbakian,
e-posta bidez,
Erletxean ostegunero 11:30etik 13:30era edo astearteroko asanbleetan. Zehaztutakoaren arabera, asanbleak txandaka egiten dituzte Irunen eta Hondarribian, eta beraz, hurrengo bilkura Hondarribiko Zuloaga Etxean izango da 19:00etatik 21:00etara.
