Udaleko langileen negoziazio mahaia irekitzea onartu du Udalbatzak
Azaroko ohiko plenoan udal langileen batzordeko azken momentuko mozioa sartu zen. Bertan, negoziazio mahaia abian jartzea eskatu zuten langileek.
Asteartean bildu zen Errenteriako Udalbatza, azaroko ohiko plenoan. Udaleko langile batzordeak, azken orduan, eguneko gai zerrendan mozio bat sartu zuen, Bildu eta Ezker Anitzak bermatuta —nahiz eta bat ez etorri—. Langileek Udal Gobernu Taldeari eskatu diote negoziazio mahaia irekitzeko, udal langileen hitzarmen erregulatzaileari dagokiona. Akordio hori bere osotasunean negoziatzea eskatu dute, eta zati baten akordioa mahai orokorrak jaso dezala. Akordio hori “gelditzea eta mahaian integratzea” nahi dute. Udal langile ordezkaritza zabal batek bete zuen pleno aretoa.
Udaltzaingoaren lau lan baldintza dira gobernuaren eta langileen artean akordio ezik handiena sortzen duena. Horietan, oporrenak sortu zuen hika-mika handien. Julen Mendoza alkateak azaldu zuenez, udaltzainen zerbitzua lau datatan indartu behar da: San Silbestre Egunean, inauterietan, Errege bezperan eta madalenetan. Udaltzainak kexu dira uztailean oporrik hartu ezin dutelako. Alkateak nabarmendu zuenez, gatazkaren muina legeak aitortzen duen udalaren autoantolakuntza gaitasuna ukatzean dagoela. Udalhitz hitzarmenaren artikulurik urratzen ez zuela aldarrikatu zuen, eta langileen proposamenaren zain dagoela ziurtatu zuen. Gaur zortzi bilera egingo dute.
Oposizioko alderdiek negoziazioaren alde egin zuten, eta adostasunera iristen ez badira, bitartekaritzara jo dezatela eskatu zuten. Langileek, bere aldetik, negoziazioa zatikatzea salatu zuten. Azkenean EAJ, PP eta PSEren —Joaquin Acosta abstenitu zen— aldeko botoekin atera zen aurrera mozia. Bildu eta Ezker Anitza abstenitu ziren.
Gainontzeko puntuak
Iazko kontu orokorra Bildu eta Ezker Anitzaren botoekin onartu zuten —gainontzekoak abstenitu ziren—. Garraioaren harmonizaziorako erregelamendua ere onartu zuten, aho batez. Horrela, bidaiarien hainbat tipologia bateratzeko bidean jarriko dira, Gipuzkoa osoan.
Emakumeen aurkako indarkeriaren kontrako Egunaren harira, bozeramaleen batzordeak onartutako adierazpen instituzionala irakurri zuten. Hori egin ostean, etenaldia izan zen plenoan mugimendu feministak deitutako elkarretaratzera joateko.
Azaroko ohiko plenoa
