Larunbatean, hilak 29, hasiko dira 2014-2015eko Hondarribiko Herri Olinpiadak. Laurak aldera iritsiko da lastargia Arrantzale auzora eta bertan izango da taldeen aurkezpena. Ondoren, herri kiroletako probak egingo dituzte.
Larunbatean egingo dute aurtengo olinpiadetako zortzi saioetatik lehena. Taldeen aurkezpenaren ondoren izango da, Arrantzale auzoan. Arratsaldeko lauretatarako espero da lastargi olinpikoa bertara iristea eta jarraian
36 taldeen aurkezpena egingo dute; une horretan talde bakoitzak logo proposamen bat emango dio epaimahaiari, eta epaileek erabakiko dute 36 marrazki horietatik zein izango den 2014-2015eko jokoen irudia.
![Iazko zaku lasterketako une bat](http://bidasoa.hitza.eus/site/files/2014/11/olinpiadak-1-16-300x199.jpg)
Iazko zaku lasterketako une bat
Batzorde olinpikoak adierazi duenez, “proba guztiak puntuagarriak izango dira”, logoen lehiaketatik hasita. Baina larunbateko proba nagusia herri kiroletakoa izango da, Arrantzale auzoaren eta San Pedro kalearen artean egingo dena. “Lau gunetan banatuko da eremua herri kirolen lau probak egiteko. Horietako batean proba ezberdin bat egingo dute: lehenean, zaku lasterketa, lau lagun zaku bakoitzean sartuz; bigarrenean, hanketatik binaka lotuta lokotxak biltzeko lasterketa; hirugarrenean, txingak; eta azkenekoan, giza karretilen lasterketa”.
Bistan denez, iazko proben ikusgarritasuna gainditzeko asmoa dute antolatzaileek. HITZAk jakin duenez, badaezpada anbulatorioko langileei ordu estrak egiteko eskatu diete, eta plantilla indartu behar izan dute Bidasoko nahiz Oarsoaldeko albaitariekin. Osasun arloko langileak ez dira beldurtuta dauden bakarrak; izan ere, olinpiadetakoek proben ondoren trikipoteoa egingo dutela aurreratu zutenetik, asko ugaritu da larunbat arratsaldean eta igande goizean libratu nahi duten tabernarien kopurua.
Oarso Bidasoko HITZAk ere jarraipen berezia eskainiko dio olinpiadetako lehen jardunaldiari, eta horren berri emango du hurrengo astean
olinpiadetako atal berezian. Gogoratu, hiru modu daudela Hondarribiko HITZAren bidez olinpiadak jarraitzeko:
hondarribia.hitza.eus webgunea,
Twitter kontua eta
Facebook orrialdea. Edonola ere, edukin guztiak —kronika serioak eta argazki galeriak barne—,
atal berezian bakarrik azalduko dira bere osotasunean.