Dei Gaztelumendi oiartzuarraren erakusketaz gain, mahai jokoak, Magic torneoa, bideojoko lehiaketa, komigintzan hasteko tailerrak eta beste hainbat jarduera izango dira Irunen.
Komiki Hamabostaldiaren aurkezpena
Irungo Komiki Hamabostaldia aurkeztu dute gaur goizean Fernando San Martin Gazteria zinegotziak, Patxi Presa Kultura arloko zuzendariak, Dei Gaztelumendi ilustratzaileak, Virginie Sabourin Angeluko (Lapurdi) liburutegiko arduradunak eta Florence Marceillac Angeluko Herriko Etxeko Kultura, Komunikazio eta Lankidetzarako delegatuak.
Ikust Alaia liburutegiak
Gaztelumendiren Euskadi fantastikoa izenpeko erakusketa hartuko du datorren urtarrilaren 10a bitartean, eta era horretan, hasiera eman diote antolatzaileek Komiki Hamabostaldiari. Ilustratzailea, komikigilea eta marrazkigilea izateaz gain, animazioaren munduan ere lanean aritu da oiartzuarra, eta Donostiako Beldurrezko eta Fantasiazko Zinemaren Astean estreinatu zuen erakusketa.
‘Euskadi Fantastikoa’ erakusketaren irudia
Irudi “maitagarriak” eta “beldurgarriak” nahastu ditu artistak erakusketan eta haren hitzetan, “muturreko gauzak” dira arlo honetan gehien atsegin dituenak.
Dagoeneko bisita daitekeen erakusketaz gain, Angeluko eta Irungo udalen artean izandako elkarlana nabarmendu nahi izan San Martinek. Zentzu horretan, hilaren 28an Martindozenean Gaztelekuan elkarlanean antolatutako beste erakusketa bat inauguratuko dute, eta horrekin batera, komikigintzan oinarritutako tailerra ere izango da bertan.
Orotariko eskaintza
Komikiaren eta ilustrazioaren munduarekin lotutako jarduerez gain, mahai jokoak, rol jokoak… ere antolatu dituzte datozen bi asteetara begira. Ondokoa da egitaraua:
- Hilak 24. Trivial Komikirun on line jokoa.
- Hilak 25. Komiki ilustrazioan hasi nahi duten lagunei zuzendutako tailerra egingo dute Lapitzeko Auzo Elkartean, 17:30ean abiatuta.
- Hilak 25 eta abenduak 2. Modelatzen ikasteko tailerra Eskukan (Jose Egino, 9) Ander Agirreren eskutik, 18:00etan abiatuta.
- Hilak 26 eta abenduak 3 eta 5. Super heroien pinak eta intsigniak eva gomarekin egiteko tailerra Martindozenean Gaztelekuan, 18:00etan abiatuta.
- Hilak 27 eta abenduak 4. Mahai jokoak Tinta Comics dendan, 17:00etan abiatuta.
- Hilak 28. Komiki ilustrazioan hasi nahi duten lagunei zuzendutako tailerra egingo dute Katea-Landetxako Auzo Elkartean, 17:30ean. abiatuta.
- Hilak 28 eta abenduak 5. Friday Night Magic Tinta Comics-en, 16:45ean abiatuta.
- Hilak 29. Magic torneoa Tinta Comics-en, 16:45ean hasita.
- Abenduak 1. Komiki sorkuntza tailerra Kabigorri Bidasoaldeko Ateneoan Jorge Madejonen eskutik, 18:00etan hasita.
- Abenduak 5. The amazing Spiderman 2 Amaia KZn (ordua zehazteke).
