Preso eta iheslarien aldeko sarea hilaren 28an iritsiko da Hondarribira
Kultur Etxean egingo dute aurkezpena, eta egitura nazionaleko bi kidek parte hartuko dute. Herritarren sarea osatu nahi du Sarek, dispertsioarekin bukatzeko. Presoak hurbiltzea eta libre beharko luketenak askatzea dira gertueneko helburuak.
Sarek, preso eta iheslarien giza eskubideen alde lanean ari den herritarren sareak, aurkezpena egingo du Hondarribiko Kultur Etxean hilaren 28an, ostirala, 19:30ean. Herriko kideez gain, “sare nazionaleko” bi kidek parte hartuko dute ekitaldian.
Aurkezpena prestatzen ari direnek azaldu dutenez, Sare sortzeko arrazoiak azalduko dituzte, eta martxan jartzeko helburuak finkatu: “Une honetan sakabanaketarekin amaitzea du helburu nagusia. Baita ere gaixorik dauden presoak askatzea, 70 urte baino gehiago duten presoak kaleratzea, 3/4-ak beteak dituzten presoak askatzea eta iheslarien deportazio eta asignazio egoerekin bukatzea”.
Sarek herritarren amarauna osatu nahi du eta nola gauzatu asmo duten azalduko dute hilaren 28an Kultur Etxean. Sarekideak lortuz, errepresaliatuen egoera zabaldu nahi dute, eta tresna bat baliatuko dute horretarako, dispertsioaren liburua. “Liburu horretan sakabanaketaren errealitate lazgarriaren berri ematen da. 500.000 ale argitaratu dira”, erantsi dute Hondarribiko Sareko arduradunek.
