Europako integrazio prozesua aztertuko dute bihar hainbat adituk
Sabino Arana Fundazioak eta Europako Demokraten Institutuak antolatu dute gaurko mintegia
Mugaz gaindiko lankidetzak Europa integratzeko prozesuan duen esanahia: gaur egungo egoera eta etorkizunerako ikuspegiak izenburuko mintegia antolatu dute Sabino Arana Fundazioak eta Europako Demokraten Institutuak (IED) biharko Itsas Etxean, 09:00etan abiatuta. Antolatzaileek jakinarazi dutenez, “Europako Batasunaren barruko mugaz gaindiko lankidetzarako politika” aztertzeaz gain, “euskal mugaren errealitatea eta Europako beste eskualdeetako mugaz gaindiko lankidetzaren” inguruan eztabaidatzea da helburua.
Ordezkaritza zabala
EAJ alderdiko Andoni Ortuzar EBBko lehendariak, Aitor Kerejeta Hondarribiko alkateak, Mikel Anton IEDeko kideak eta Sabino Arana Fundazioko Juan Mari Atutxa lehendakariak parte hartuko dute mintegian. Horiez gain, Eusko Jaurlaritzako, Gipuzkoako Foru Aldundiko eta Ipar zein Hego Euskal Herriko adituak eta ordezkari politikoak izango dira.
Hori horrela, jardunaldiaren irekiera ekitaldia egingo dute 09:00etan. Horren ondotik, mahaingurua izango da Mugaz gaindiko lankidetza politika Europako Batasunean goiburupean eta segidan, Lankidetza euskal mugan izenpeko solasaldia abiatuko dute. Azkenik, Europako beste eskualde batzuetako mugaz gaindiko lankidetza gaia jorratuko dute mintegian parte hartzen dutenek.
