Jon Pagadizabal Aiako San Martin txapelketako txapeldunorde izan da

Hondarribiarrak Jon Aranberri aiarrarekin jokatu du Aia herriko jaietako txapelketa. Finala Hernaniko bikotearen kontra galdu dute, 22-18.

Asier Perez-Karkamo

Hondarribia

2014/11/17

Aranberri eta Pagadizabal —eskuinekoa—, Aretxabaletarekin

Aranberri eta Pagadizabal, Aretxabaletarekin

Aiako (Gipuzkoa) San Martin jaietako binakako pilota txapelketa irabaztetik gertu izan zen Jon Pagadizabal hondarribiarra, Jon Aranberri aiarrarekin bikotea osatuz. Finala Hernaniko Ioritz San Sebastian eta Eñaut Esnaolaren kontra jokatu zuten, eta azken hauek nagusitu ziren 22-18. Hortaz, txapelik gabe geratu zen Pagadizabal, baina bigarren sariarekin itzuli da Hondarribira. Andoni Aretxabaleta pilotari profesionalak banatu zituen Aiako txapelketako sariak. Aurreko faseko bi partidak irabazita finalera iritsi ziren Pagadizabal eta Aranberri. Koadroaren beste aldetik Hernaniko bikoak bide berbera egin zuen. Finala atzo jokatu zen, harmailak beteta zituen Urdaneta pilotalekuan. Bi bikoteak giroaz kutsatu ziren eta partida gogorra eskaini zieten zaleei. Azkenean hernaniarrak nagusi, baina Pagadizabal gustura geratu da txapelketan zehar emandako mailarekin. “Partida bikaina atera zen”, esan dio HITZAri. Nagusien Gipuzkoako ligako Hirugarren Mailan jokatzen du hondarribiarrak, Julen Mayarekin. Aurten ezin izan dute herriarteko txapelketako azken faserako sailkatu, baina Aian maila handia eman du Pagadizabalek, eta finalean egindakoarekin gustura geratu dira: “Hurrengo urterako gogo eta inplikazio handiagoa jartzeko indarra eman digu partidak”, erantsi du Pagadizabalek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.